युरो २०२०: बुधबारको पहिलो खेलमा रुस र फिनल्यान्ड भिड्दै

काठमाडौं । युरो २०२० को दोस्रो चरण बुधबारदेखि सुरु हुँदैछ । नेपाली समयअनुसार समूह ‘बी’ अन्तर्गत साँझ ६:४५ बजे सुरु हुने खेलमा पहिलो पटक युरोपियन च्याम्पियनसिपमा छनोट भएको फिनल्यान्डले रुसको सामना गर्दैछ ।

रुसको सेन्ट-पिटर्सबर्ग रंगशालामा हुने खेलमा घरेलु टोलीलाई पराजित गर्दै फिनल्यान्ड अन्तिम १६ स्थान सुरक्षित गर्न चाहन्छ । पहिलो खेलमा डेनमार्कविरुद्ध १-० को कठिन जित निकालेको फिनल्यान्डको तीन अंक छ । त्यस्तै, पहिलो खेलमा बेल्जियमसँग ३-० ले पराजय भोगेको रुस अन्तिम १६ प्रवेशको सम्भावना बलियो बनाउन आजको खेल जित्नै पर्ने दबाबमा छ ।

यद्यपि, रुसविरुद्धका पछिल्ला चार खेलमा १ गोल मात्र गर्न सफल भएको फिनल्यान्डलाई आजको खेलमा घरेलु टोलीको दबाब सहनुपर्ने सहजै अनुमान गर्न सकिन्छ । यसअघि, रुसविरुद्ध फिनल्यान्डले अन्तिम पटक १९९५ को नोभेम्बरमा अन्तिम पटक गोल गर्न सफल भएको थियो ।

रुसले युरोपेली मुलुकविरुद्ध खेलेका पछिल्ला ६ खेलमा जित दुई बराबरी र चार खेलमा पराजय भोग्दा जितविहीन बनेको छ ।