चोटका कारण हेन्डरसनले छाडे इङ्लिस टोली

काठमाडौं । म्यानचेस्टर युनाइटेडका गोलकिपर डिन हेन्डरसनले चोटका कारण युरो २०२० का लागि इङ्लिस टोलीबाट नाम फिर्ता लिएका छन् ।

‘हिप’मा देखिएको समस्याका कारण हेन्डरसनले नाम फिर्ता लिएसँगै उनको स्थान शेफिल्ड युनाइटेडका गोलकिपर एरोन राम्सडेलले लिने भएका छन् ।

प्रतियोगिता सुरु हुनु अगावै टोलीको घोषणा गरिसक्नु पर्ने भए पनि चोटका कारण गोलकिपरले खेल्न नसक्ने भए परिवर्तन गर्न सकिने युइएफएको नियम छ ।

उनको स्थान लिएका राम्सडेल इङ्ल्यान्डको ३३ सदस्यीय प्रारम्भिक टोलीमा परेका थिए । तर, अन्तिम टोली अटाएका थिएनन् । राम्सडेलले यसअघि पनि इङ्ल्यान्डको प्रतिनिधित्व गरेर खेलिसकेका छन् । उनले मार्चमा भएको यु २१ युरोमा इङ्लिस टोलीमा स्थान बनाएका थिए ।

नाम फिर्ता लिएका हेन्डरसन म्यानचेस्टर युनाइटेड फर्किने छन् । त्यहाँ युनाइटेडकै मेडिकल स्टाफले उनको उपचारमा सहयोग गर्नेछन् ।