डेनमार्कका टीम डाक्टरले यसरी बचाए एरिकसनको जीवन…

काठमाडौं । युरो २०२० अन्तर्गत फिनल्यान्डविरुद्धको खेलमा अचेत भएर ढलेका थिए, क्रिस्टियन एरिकसन । र, डेनमार्कका टिम डाक्टर मोर्टेन बोसेन उनीसामु पुग्दा एरिकसनको ‘पल्स बिट’ घटिरहेको थियो, र एक सेकेन्ड पनि खेर फाल्ने समय थिएन ।

‘उनी सास फेर्दै थिए, र मैले उनको ‘पल्स’ महसुस गर्नसकिरहेको थिएँ,’ बोसेनले भने, ‘तर, बिस्तारै त्यो परिवर्तन हुँदै गयो । र, सबैले देखेअनुसार हामीले कार्डियोपोल्मोनरी रिससिटेसन (सीपीआर) दियौं ।’

त्यसपछिको १० मिनेट युरोपियन च्याम्पियनसिपको इतिहासमै सबैभन्दा डर लाग्दो क्षण रह्यो । केही मेडिकल स्टाफहरू एकदमै चिन्तित थिए । त्यतिबेला डेनमार्कका अन्य खेलाडीहरूले घेरा लगाएर एरिकसनमाथि भइरहेको उपचार छेकेका थिए ।

‘रंगशालाको उत्साहित माहोल सन्नाटामा परिणत भएको थियो तर हामी निरन्तर उपचार गरिरहेका थियौं,’ बोसेनले भने, ‘मेडिकल टोलीले एकदमै छिटो मद्दत गर्‍यो‍, हाम्रो सहकार्य पनि एकदमै राम्रो रह्यो । हामीले जे गर्नुपर्थ्यो त्यो गर्‍यौं र क्रिस्टियनलाई फिर्ता पायौं ।’

एरिकसनको अहिले पनि अस्पतालमा उपचार जारी छ र डेनमार्क फुटबल संघले दिएको जानकारी अनुसार उनी खतरा मुक्त छन् ।