लुकाकुद्वारा आफ्नो गोल क्रिष्टियनको नाममा समर्पित, बेल्जियम ३–० ले विजयी

एजेन्सी । युरोपियन च्याम्पियनसिपमा रुसविरुद्ध गोल गरी बेन्जियमलाई जित दिलाएपछि रोमेलु लुकाकुले इन्टर मिलानका आफ्ना टिममेट क्रिष्टियन एरिक्सनको स्वास्थ्यलाभको कामना गरेका छन् ।

डेनमाकका मिडफिल्डर एरिक्सन गएराति समूह बी अन्तर्गत फिनल्याण्डसँगको खेलका क्रममा मैदानमै अचेत भएका थिए । उनको मैदानमै आकस्मिक उपचार भएको थियो ।

एरिक्सन ढलेपछि खेल प्रभावित हुँदा सोही समूह अन्तर्गत बेल्जियम र रुसबीच सेन्ट पिटर्सवर्गमा हुनुपर्ने खेलको सन्चालनमा पनि अन्यौल भएको थियो । डेनिस फुटबल संघले एरिक्सनको अस्पतालमा होस आएको र खेल सन्चालन गर्ने निर्णय गरेपछि समूहको अर्को खेल पनि निर्धारित समयमै सुरु भयो ।

लुकाकुले खेलको सुरुमै रुसका गोलरक्षक आन्द्रे सेभेनोभको कमजोरीका कारण बेल्जियमलाई अग्रता दिलाउन सफल रहे । गोलको खुसीयाली मनाउने क्रममा उनले टेलिभिजन क्यामरा अगाडि उभिएर ‘क्रिश क्रिश आइ लभ यू’ भनेका थिए ।

खेलपछि लुकाकुले पत्रकारसँग कुरा गर्दै लुकाकुले एरिक्सनको अवस्था थाहा पाउँदा आफू रोएको बताएका थिए । ‘म धेरै डराएँ । हामीले थुप्रै बलियो क्षण विताएका छौं । मैले उनीसँग आफ्ने परिवारसँग भन्दा धेरै समय विताएको छु,’ लुकाकुले भने, ‘खेल खेल्न मेरा लागि कठिन थियो । उनी छिट्टै निको होउन् । मेरो यो प्रदर्शन उनकै नाममा समर्पित गर्न चाहन्छु ।

सन् २०१० मा राष्ट्रिय टोलीमा डेब्यू गरेका लुकाकु अहिले शानदार लयमा देखिन्छन् । उनकै प्रेरणादायी प्रदर्शनमा इन्टर मिलानले यस सिजनको सिरी ए जितेको थियो । उनले बेल्जियमका लागि पछिल्लो १५ खेलमा गोलसंख्या २० पु¥याएका छन् ।

बेल्जियमका लागि दोस्रो गोल थोमस मुनिरले गरेका थिए । खेलको सुरुमै तिमोथी कास्टन चोटग्रस्त भएपछि मुनिर मैदान छिरेका थिए । खेलको अन्त्यतिर लुकाकुले नै गोल गरी फिफा वरियतामा शीर्ष स्थानमा रहेको बेल्जियमलाई युरोको पहिलो खेलमा सहज जित दिलाए ।