गण्डकी प्रदेश प्रमुखको कार्यालयले भन्यो : मुख्यमन्त्रीमा कृष्णचन्द्रको मात्रै दाबी थियो

कास्की । गण्डकी प्रदेश प्रमुखको कार्यालयले कृष्णचन्द्र पोखरेललाई मुख्यमन्त्री नियुक्त गरिएको औपचारिक सूचनाको जानकारी दिएको छ । तर, मुख्यमन्त्रीका लागि पृथ्वीसुब्बा गुरुङले पनि दावी पेश गरेको समाचारलाई भने कार्यालयले नकारेको छ ।

मुख्यमन्त्रीको कार्यालयद्वारा जारी वक्तव्यमा तोकिएको समयभित्र मुख्यमन्त्रीमा कृष्णचन्द्रको मात्रै दावी पेश भएको उल्लेख छ ।

विज्ञप्तिमा भनिएको छ, ‘२९ गते दिउँसो ३ बजेसम्ममा माननीय कृष्णचन्द्र नेपालीको एक मात्र मुख्यमन्त्रीको दावी निवेदन दर्ता हुन आएकाले प्रदेश प्रमुख माननीय सीताकुमारी पौडेलज्यूले गण्डकी प्रदेशको मुख्यमन्त्रीमा उहाँलाई नेपालको संविधानको धारा १६८ को उपधारा (५) बमोजिम नियुक्त गर्नुभएको छ ।’

गुरुङले पनि दाबी गरेकाले मुख्यमन्त्री नियुक्तीमा ढिलाइ भएको भन्दै विपक्षी गठवन्धनले प्रदेश प्रमुखको कार्यालयमा धर्ना दिएको थियो ।