दैलो-दैलो पुगेर सहायता बाँड्दै फिल्म ‘गोर्खा वारियर’ (तस्विरहरु)

काठमाडौं । फिल्म ‘गोर्खा वारियर’ले कोभिड-१९ महामारीबाट प्रभावित नागरिकलाई स्वास्थ्य, खाद्यान्न तथा आर्थिक सहायता प्रदान गरेको छ ।

निर्देशक एवं निर्माता मिलन चाम्स र अभिनेता रितेश चाम्सले यसैसाता पूर्वी नेपालका ओखलढुंगा, रामेछाप र दोलखा जिल्ला पुगेर प्रभावित बासिन्दालाई सहायता प्रदान गरे ।

सय परिवारलाई खाद्यान्न, २५ जनालाई आर्थिक सहयोग र अन्यलाई मास्क, एन्टीजेन किट्, सेनिटाइजर लगायतका स्वास्थ्य सामग्री वितरण गरिएको निर्देशक चाम्सले नेपाल प्रेसलाई जानकारी दिए ।

सहायता वितरणमा ओएसआर डिजिटल फाउन्डेसन र टिभी रियालिटी कमेडी च्याम्पियनले पनि हातेमालो गरेका थिए । ‘हामी सँधै नागरिकको सहयोगमा उभिन तयार छौं’ चाम्सले भने, ‘नागरिकलाई कोरोनाको रोकथामबारे अझै सचेत तुल्याउनुपर्ने देखियो ।’

गतसाता चाम्स नेतृत्वको गोर्खा वारियर टीमले काठमाडौं महाराजगञ्जस्थित शिक्षण अस्पतालका स्वास्थ्यकर्मीलाई स्वास्थ्य सामग्री समेत वितरण गरेको थियो । चाँडै सिन्धुपाल्चोक, खोटाङ र गोरखाका प्रभावित नागरिकलाई पनि सहायता प्रदान गरिने चाम्सले जनाए ।

देशभक्ति भावना पेश गर्ने फिल्म गोर्खा वारियर कोरोनाभाइरस महामारी सामान्य भएपछि छायांकनको कार्यमा अघि बढ्ने तयारीमा छ ।