एमाले सचेतकको प्रश्न- काठमाडौंमा पानी पर्‍यो भनेर पोखरामा छाता ओढ्ने ?

कास्की । नेकपा एमाले गण्डकी प्रदेशसभाका प्रमुख सचेतक मायानाथ अधिकारीले ‘काठमाडौंमा पानी पर्दा पोखरामा छाता ओढ्न नमिल्ने’ भन्दै मुख्यमन्त्री पृथ्वीसुब्बा गुरुङको बचाउ गरेका छन् ।

प्रदेशसभाको जारी बैठकमा विश्वासको मत सम्बन्धी प्रस्तावको पक्षमा धारणा राख्दै अधिकारीले संघीय सरकारमा भएका विवादको हल प्रदेश सरकारमा खोज्न नहुने बताए । ‘संघीय सरकारको रिस गण्डकी सरकारमा फेर्न मिल्दैन । केपी ओलीसँग कुरा मिलेन भनेर पृथ्वीसुब्बा गुरुङसँग रिस फेर्नु राम्रो होइन । जनताले अहिले अस्थिरता खोजेको होइन’, अधिकारीले भने ।

जनताको म्याण्डेट कांग्रेसलाई मुख्यमन्त्री बनाउने नरहेको भन्दै अधिकारीले माओवादी अप्राकृतिक गठबन्धनका लागि तयार भएको आरोप लगाए ।

‘हामी यहिँ छौं । निषेधको राजनीति सफल हुन दिँदनौँ । माओवादीले किन जनमतको अपमान गरेको हो ?’, अधिकारीले प्रश्न गरे ।