प्रदेश-२ को बजेट अधिवेशन आजदेखि, जसपाका महन्थ पक्षले वैठकमा अवरोध गर्न सक्ने

जनकपुरधाम । प्रदेश–२ प्रदेशसभाको छैटौं अधिवेशन (बजेट अधिवेशन) आजबाट सुरु हुँदैछ । प्रदेश प्रमुख डा. राजेश झा ‘अहिराज’ले आज दिउँसो १ बजे प्रदेशसभाको छैटौं अधिवेशन आह्वान गरेका छन् ।

आजको बैठकमा दलका नेताहरूले शुभकामना दिने र त्यसपछि आर्थिक मामिला तथा योजनामन्त्री विजय यादवले प्रि-बजेटमाथि छलफल सुरु गर्ने कार्यसूची छ ।

प्रदेशमा जनता समाजवादी पार्टी (जसपा)को सरकार छ । पार्टीका अध्यक्ष महन्थ ठाकुर पक्ष संघीय सरकारमा सहभागी भएपछि अर्का अध्यक्ष उपेन्द्र यादवले हिजो आइतबार दिउँसो मुख्यमन्त्री लालबाबु राउतलाई प्रदेश संसदीय दलका नेता बनाए । हिजै राति महन्थ ठाकुर पक्षका मन्त्री जितेन्द्र सोनन र तीन राज्यमन्त्रीलाई बर्खास्त गरियो ।

महन्थ ठाकुर पक्षका चार मन्त्रीलाई बर्खास्त गरिएका कारण उनी पक्षाीय सांसदले प्रदेशसभा बैठक अवरुद्ध पार्ने सम्भावना देखिएको छ । प्रदेश सरकारले जेठ २७ मा नीति तथा कार्यक्रम र अगामी असार १ मा बजेट ल्याउने तयारीमा जुटेको छ ।