सरकार बनाउन इजरायलका विपक्षी दलबीच सहमति जुट्यो, नयाँ प्रधानमन्त्री नाफ्टाली बेनेट हुने

तेलअभिभ । इजरायलका विपक्षी दलहरुले बेन्जामिन नेतान्याहुको १२ वर्ष लामो सरकारलाई हटाएर नयाँ सरकार बनाउने सहमति गरेका छन् ।

मध्यपन्थी दल यश अतिदका नेता एर ल्यापिडले आठ दलीय गठबन्धन निर्माण भएको जानकारी दिएका छन् ।

पालैपालो सरकारको नेतृत्व गर्ने सहमतिअनुसार दक्षिणपन्थी यामिना दलका नेता नाफ्टाली बेनेट प्रधानमन्त्री बन्दैछन् । उनले ल्यापिडलाई सहमतिअनुसार सत्ता हस्तान्तरण गर्ने भएका छन् ।

यद्यपी, नयाँ सरकार बनाउन सपथ ग्रहण अगाडि संसदको मतदान अनिवार्य हुनु पर्ने व्यवस्था छ ।

ल्यापिडले एक विज्ञप्ती जारी गर्दै विपक्षी दलको सहमतिबारे राष्ट्रपति रुभेन रिभ्लिनलाई जानकारी गराइएको जनाएका छन् । उनी भन्छन्, ‘अब बन्ने सरकार हामीलाई भोट दिने वा नदिने दुबै इजरायली नागरिकको सेवामा समर्पित हुने जानकारी गराउँछु ।’

‘सरकारले प्रतिपक्षीलाई पनि सम्मान गर्नेछ र इजरायली समाजका सबै क्षेत्रलाई एकीकृत गर्नको लागि सबै शक्ति परिचालन गर्नेछ’ ल्यापिडले भनेका छन् ।

इजरायली मिडियामा सार्वजनिक भएको एक तस्विरमा विपक्ष दलका नेताहरुले सामूहिकरुपमा हस्ताक्षर गर्दै गरेको देख्न सकिन्छ ।

प्रतिक्रिया

Leave a Reply

Your email address will not be published. Required fields are marked *