कोरोना संक्रमितलाई भेट्न स्वास्थ्य सामग्री लिएर मेयर घर-घरमा

सिन्धुपाल्चोक । बाह्रविसे नगरपालिका-६ मान्द्राकी वृद्धा भक्तियामा श्रेष्ठले आफुले मत दिएर पठाएको जनप्रतिनिधिलाई आफ्नै घर मै भेट्दा निकै खुसी थिइन् ।

आपत्त बिपत्तमा सरकारका प्रमुख घरमै आएर सन्चो, बिसन्चो र हालखबर सोध्दा पनि धेरै दुःख त त्यतीकै हराउँदो रहेछ श्रेष्ठले भनिन् । स्थानीय सरकारका प्रमुखले घर मै आएर साबुन, मास्क लगायत स्वास्थ्य सामग्री दिएपछि श्रेष्ठ खुसी थिइन् ।

बाह्रविसे नगरपालिका यार्साकी विष्णुकुमारी तामाङले पनि आफ्नै बस्तीमा नगरप्रमुख आएर स्वास्थ्य सामग्री दिँदा खुशी थिइन ।

कोरोना कहरका बिचमा पनि आफ्ना नगरबासीको स्वास्थ्य अवस्था बुझ्न स्वास्थ्य सामग्री सहित बाह्रविसे नगरपालिकाका मेयर निमफुञ्जो शेर्पा नगरपालिकाका सबै वडाहरुमा पुग्दा स्थानीय खुशी भएका थिए ।

गाउँ-गाउँमा धेरै संक्रमितहरु अहिले पनि होम आइशोलेसनमा बस्नु भएको रहेछ, उहाँहरुलाई आवश्यक स्वास्थ्य सामग्री र औषधी बोकेर हामी जनप्रतिनिधिहरु सबै वडामा जान सुरु गरेका छौं, मेयर शेर्पाले भने । शेर्पाले संक्रमितहरुको अवस्था बुझीरहेको र नगरपालिकाबाट यस अघि भएका विकास निर्माणका कार्यहरुको पनि सँगै अनुगमन गर्न सुरु गरिएको बताए ।

बस्तीमा बिरामीहरुको संख्या धेरै देखिएमा पीसीआर गर्ने टोली गाउँमा नै लगेर सबैको पीसीआर गर्ने तयारी नगरपालिकाले गरेको मेयर शेर्पाले जानकारी दिए । नगरपालिकाका सात वडा मध्ये हालसम्म १,२,६ र ८ वडाका बस्तीहरुमा पुगीसकेको र अब बाँकी वडाहरुमा पनि स्वास्थ्य सामग्री सहित आफुहरु पुग्ने मेयर शेर्पाले बताए ।

हामीले नगरका सबै उपस्वास्थ्य चौकी, स्वास्थ्य स्वयमसेविका र स्वास्थ्यकर्मीहरु मार्फत प्रदान गरीएका सेवाहरुप्रति जनताको धारणा र सुझाव बुझ्न आफुले अनुगमन गरेको मेयर शेर्पाले बताए । ‘हामी नगरको आगमी वर्षको नीति कार्यक्रम र बजेटको तयारीमा छौ, बस्तीमा पुगेर स्थानीयको सुझावलाई समेत लिएर बजेट निर्माण गर्ने योजनामा छौं, मेयर शेर्पाले भने ।

नगरपालिका र विभिन्न संघ संस्थाहरु मार्फत स्वास्थ्य सचेतता र सतर्कताका सामाग्रीहरु पर्याप्त रुपमा गाउँमा पठाइएको भए पनि अझै ग्रामीण क्षेत्रमा माक्स, सेनिटाइजरको प्रयोग र भौतिक दुरीको मापदण्ड कायम गर्ने व्यवहारमा सोचेजति सुधार नदेखिएको मेयर शेर्पाको भनाई थियो ।