इराकविरुद्ध पहिलो हाफमा नेपाल ४-२ ले पछाडि

काठमाडौं । डेब्युट्यान्ट मनिष डाँगीको गोलसँगै लिएको अग्रता जोगाउन नसक्दा इराकविरुद्धको मैत्रीपूर्ण खेलको पहिलो हाफमा नेपाल ४-२ को नतिजामा पछिपरेको छ ।

इराकको दोस्रो ठूलो शहर बसरास्थित अल्फाहया रंगशालामा जारी खेलको सातौं मिनेटमा घरेलु टोलीका कप्तान अला अब्दुल जहर खासिनले फ्रि-किकमा नेपाली कप्तान किरण चेम्जोङलाई बिट् गर्दै उत्कृष्ट गोल गरेका थिए ।

त्यसको एक मिनेट नबित्दै अञ्जनको प्रहारमा हमद इब्राहिम खलाफले गरेको बचाउने कोसिस असफल हुँदा नेपाल बराबरीमा पुगेको थियो ।

नेपालका लागि पहिलो पटक मैदानमा उत्रिएका मनिषले २९औं मिनेटमा गोल गर्दै नेपाललाई २-१ अग्रता दिलाएका थिए ।

त्यसपछि सम्हालिन नसकेको नेपालले ३९औं मिनेटमा दोस्रो गोल खायो । इराकका लागि मोहमद अब्दुलझाराले गोल गर्दै २-२ को बराबरीमा ल्याएका थिए । त्यसको एक मिनेट नबित्दै नेपालले  पुन: गोल खायो । ४० औं मिनेटमा एमेन हुसेनले गोल गर्दै इराकलाई पुन: ३-२ को अग्रता दिलाएका थिए ।

अन्तिम समयमा सम्हालिन नसकेको नेपाली रक्षापंक्तिमाथि निरन्तर आक्रमण गरेको इराकका लागि इन्जुरी समयमा हुसेनले व्यक्तिगत दोस्रो गोल गर्दै घरेलु टोलीका लागि ४-२ को अग्रता निश्चित गरे ।