राउन्ड टेबल नेपालद्वारा २५ लाखको स्वास्थ्य उपकरण प्रदान

काठमाडौं । सामाजिक संस्था राउन्ड टेबल नेपालले अस्पतालहरुलाई कोभिड-१९ महामारीविरुद्ध २५ लाख बराबरको स्वास्थ्य उपकरण सहयोग गरेको छ ।

प्रोजेक्ट लाइफलाइन कार्यक्रम अन्तर्गत संस्थाले जरुरी स्वास्थ्य उपकरण सहयोग उपलब्ध गराएको हो । कोभिड बिरामीको उपचारका लागि जरुरी हुने BiPaP र HFNC उपकरण निःशुल्क उपलब्ध गराइएको हो ।

भेन्टिलेसन थेरापीको एउटा प्रकार मानिने BiPaP कोभिड बिरामीलाई श्वासप्रश्वासमा सजिलो तुल्याउने एउटा उपकरण हो । एकसाता अघि सुरु भएको प्रोजेक्टअन्तर्गत संस्थाले अहिलेसम्म २५ वटा उपकरण वितरण गरिसकेको छ ।

डोल्पाको दुनै जिल्ला अस्पताल, मुगुको गमगढी जिल्ला अस्पताल, कालिकोट जिल्ला अस्पताल, हुम्ला जिल्ला अस्पताल, जाजरकोट जिल्ला अस्पताल, भैरहवाको भीमा अस्पताललाई एकएक थान BiPaP उपकरण प्रदान गरिएको छ ।

बुटवलको सिद्धार्थ महिला तथा बालबालिका अस्पताल, पाटन अस्पताल र धनगढीको सेती प्रादेशिक अस्पताललाई २-२ BiPaP उपलब्ध गराइएको छ ।

सशष्त्र प्रहरी अस्पताललाई ५, नेपाल प्रहरी अस्पताललाई ५, जे एन्ड जे क्लिनिकलाई १ र बीर अस्पताललाई २ थान BiPaP निःशुल्क भाडामा दिइएको जनाइएको छ ।

प्रोजेक्ट लाइफलाइन कार्यक्रम अन्तर्गत ५० उपकरण देशभरका अस्पतालमा वितरण गर्ने तयारी गरिएको छ ।

प्रतिक्रिया

Leave a Reply

Your email address will not be published. Required fields are marked *