प्रदेश २ सरकार ५० हजार भिटिएम र रिएजेण्ट खरिद गर्ने

जनकपुरधाम । प्रदेश २ सरकारले थप ५० हजार भिटिएम र रिएजेण्ट खरिद गर्ने निर्णय गरेको छ । कोरोना परीक्षणको दायरा बढाउन प्रादेशिक कोरोना भारइरस व्यवस्थापन समितिको बैठकबाट भिटिएम र रिएजेण्ट खरिद गर्ने निर्णय गरिएको हो ।

मुख्यमन्त्री लालबाबु राउतले आइतवार र सोमवार प्रदेशस्थित सबै अस्पतालका मेडिकल सुपरिटेन्डेन्ट, अस्पताल रहेका पालिकाका प्रमुखहरु र प्रमुख जिल्ला अधिकारीहरुसंग भर्चुअल छलफल गरेका थिए ।

छलफलका क्रममा सम्बन्धित अधिकारीहरुले दिएको सुझाव बमोजिम थप भिटिएम र रिएजेण्ट खरिद गर्ने निर्णय गरिएको मुख्यमन्त्री राउतले बताए ।

बैठकले प्रदेशमा हुन सक्ने अक्सिजनको आभावलाई मध्य नजर गर्दै संघीय सरकारसंग तत्काल ४ हजार अक्सिजन सिलिण्डर मांग गर्ने निर्णय पनि गरिएको छ ।

यस्तै होम आइसोलेशनमा रहेका संक्रमितहरुको हेरचाहका लागि स्थानीय तहहरुसंग समन्वय गर्ने निर्णय पनि गरिएको छ । साथै जिल्ला जनस्वास्थ्य कार्यालयको समन्वयमा प्रत्येक अस्पतालमा हेल्थ डेस्क स्थापना गर्ने निर्णय समेत बैठकले गरेको छ ।