अख्तियारको आयुक्तमा डा. हरि पौडेल र डा. सुमित्रा अमात्य सिफारिस

काठमाडौं । अख्तियार दुरुपयोग अनुसन्धान आयोगको आयुक्तमा डा. हरि पौडेल र डा. सुमित्रा अमात्य सिफारिस भएका छन् ।

संवैधानिक परिषदको आइतबार बसेको बैठकले अख्तियारमा यी दुई पिएचडी होल्डरको नाम सिफारिस गरेको हो ।

आयुक्तमा सिफारिस भएका पौडेल राष्ट्रपति कार्यालयका सचिव हुन् भने डा. अमात्य प्राध्यापक तथा राष्ट्रिय योजना आयोगको पूर्व सदस्य हुन् । अमात्य काठमाडौं महानगरपालिकाको फोहोर मैला व्यवस्थापन विभागको प्रमुख समेत थिइन् ।

पौडेलले सार्वजनिक प्रशासनमा विद्यावारिधी गरेका छन् । उनी निजामति प्रशासनमा कहिल्यै पनि विवादमा नआएका र आफ्नो विषयमा विज्ञ कर्मचारीका रुपमा परिचित छन् ।

अमात्य नेपाल कम्युनिस्ट पार्टीका तत्कालीन महासचिव तुलसीलाल अमात्यकी बुहारी हुन् । तुलसीलाल मृत्युपर्यन्त नेकपा एमालेको मानार्थ स्थायी कमिटी सदस्य थिए ।

अख्तियारका तत्कालीन आयुक्त डा. गणेशराज जोशीको राजीनामा र सावित्री गुरुङको कार्यकाल सकिएपछि रिक्त रहेका दुई पदमा पौडेल र अमात्यको नाम सिफारिस भएको स्रोतले जनाएको छ ।