चेल्सीसँग हारेपछि सिटीलाई प्रिमियर लिगको उपाधि जित्न अर्को खेल कुर्नुपर्ने

सर्जियो एग्युरोले पेनाल्टीमा गोल गर्न असफल भएपछि इंग्लिस प्रिमियर लिगको उपाधिका लागि म्यानचेस्टर सिटीलाई अर्को खेल कुर्नुपर्ने भएको छ ।

यो सिजनको प्रिमियर लिग उपाधिका लागि सिटी एक जित टाढा छ । तर चेल्सीले उसकै मैदान इथिहाड रंगशालामा २–१ गोलअन्तरको हार चखाएपछि न्युकाशल युनाइटेडसँग हुने अर्को खेलसम्म कुर्नुपर्ने भएको छ ।

चेल्सीविरुद्ध सिटीले पहिलो हाफमा अग्रता बनाएको थियो भने अग्रता दोब्बर पार्ने अवसर पनि खेर फालेको थियो । एग्युरोकै पासमा रहिम स्टर्लिङले गोल गरेपछि ४४ औं मिनेटमा सिटीले अग्रता बनायो । पहिलो हाफको इन्जूरी समयमा विल्ली गिलमोरले गाव्रियल जेससलाई फल गरेपछि पाएको पेनाल्टीमा एग्युरोको प्रहार चेल्सीका गोलरक्षक एडवार्ड मेन्डीले सजिलै बचाएका थिए ।

दोस्रो हाफमा चेल्सीले शानदार पुनरागमन गर्‍यो । ६३ औं मिनेटमा हामिक जियाजको गोलबाट बराबरी गरेको चेल्सीले खेलको इन्जूरी समयमा मार्कस एलन्सोले गोल गरेपछि नाटकीय जित हासिल गरेको हो ।

यो जितले चेल्सीलाई शीर्ष तीनभित्र पुर्‍याएको छ । ३५ खेलबाट चेल्सीको ६४ अंक भएको छ । शुक्रबार न्युकाशलसँग हारेको लिसेस्टर सिटी ६३ अंकसहित चौथो स्थानमा झरेको छ ।

लिगको अन्तिमतिर बलिया प्रतिस्पर्धीबिरुद्धको यो जितले चेल्सी यस सिजन च्याम्पियन्स लिगमा छनोट हुने सम्भावना प्रवल लगभग निश्चित बनेको छ ।