न्यूजिल्यान्डकी प्रधानमन्त्रीले आउने ग्रीष्म ऋतुमा विहे गर्ने

वेलिङ्टन । न्यूजिल्यान्डकी प्रधानमन्त्री ज्याकिन्डा आर्डेनले आउने ग्रीष्म ऋतुमा प्रेमीसँग विहे गर्ने भएकी छिन् ।

स्थानीय कोस्ट रेडियोको विहानी सेवालाई अन्तर्वार्ता दिँदै प्रधानमन्त्रीले प्रेमी क्लार्क गेफर्डसँग आफूले लगनगाँठो कस्न लागेको जानकारी दिएकी हुन् ।

उनीहरुबीच दुईवर्षअघि नै इन्गेजेमन्ट भएको थियो । उनीहरुले विहे अघि नै नीभ नाम गरेकी २ वर्षिया छोरीलाई जन्म दिएका छन् ।

सन् २०१८ मा प्रधानमन्त्री चुनिएकी आर्डेन आधुनिक राजनीतिमा प्रधानमन्त्रीको कुर्सीमा बहाल रहँदै बच्चालाई जन्म दिने दोस्रो प्रधानमन्त्री बनेकी थिइन् । उनका पे्रमी गेफर्ड टेलिभिजन होस्ट हुन् भने छोरी निभलाई पनि हेरचाहमा सक्रिय छन् ।