लकडाउनले पुनः रोकियो फिल्म छायांकन : ‘कबड्डी’ चार र ‘तिमीसँग हुने मन छ’ले रोके सुटिङ

काठमाडौं । विहिबारदेखि उपत्यकासहितका विभिन्न स्थानमा सुरु हुने कोभिड-१९ लकडाउनको कारण फिल्म छायांकन प्रभावित बनेको छ ।

छायांकनमा जाने तयारीमा रहेका फिल्म रोकिएका छन् जसले गर्दा फिल्म गतिविधि पुनः अनिश्चित बनेको छ । निर्माताहरुले कोभिड साम्य भएपछि मात्र फिल्म सुटिङ हुने जनाएका छन् ।

कबड्डीको चौथो श्रृंखला यसैसातादेखि फ्लोरमा जाने तयारीमा थियो । तर, पुनः लकडाउन हुने भएकाले आफूहरुले योजना स्थगित गरेको निर्माता मणीराम पोखरेलले जानकारी दिए ।

‘अहिलेको परिस्थितीको कारण फिल्म सुटिङ स्थगित गरेका छौं’ पोखरेलले भने, ‘कोभिड परिस्थिती साम्य भएपछि मात्र फिल्म सुटिङ सुरुआत गछौं ।’

बैशाख ५ गतेदेखि छायांकन सुरु हुने भनिएको दिवाकर भट्टराईले निर्देशन गर्ने फिल्म ‘तिमीसँगै हुने मन छ’को छायांकन पनि रोकिएको छ । रोहित सुचान्ती, दीपिका प्रसाइँ र नाजिर हुसेनले अभिनय गर्ने फिल्मले तत्कालका लागि सुटिङ रोकेको हो ।

अन्य झन्डै एकदर्जन फिल्म पनि रोकिएका छन् ।