शेरबहादुर तामाङले सम्हाले एमाले केन्द्रीय कार्यालय सचिवको पदभार

काठमाडौं । नेकपा (एमाले) का केन्द्रीय सदस्य तथा वागमती प्रदेश सह-इन्चार्ज शेरबहादुर तामाङले पार्टी केन्द्रीय कार्यालय सचिवको पदभार ग्रहण गरेका छन् ।

तामाङलाई आइतबार पार्टी महासचिव ईश्वर पोखरेलले पदभार ग्रहरण गराएका हुन् । पदभार ग्रहणपछि तामाङले कार्यालय सञ्चलनलाई थप चुस्त बनाउने, पार्टीको नेता र कार्यकर्ता बीचको अन्तरसम्बन्धलाई थप बलियो बनाउने प्रतिबद्धता जनाएका छन् ।

तामाङले फेसबुकमा लेखेका छन्, ‘मलाई यो जिम्मेवारी प्रदान गरेकोमा पार्टी नेतृत्वलाई धन्यवाद ।’

१० वैशाखमा बसेको महाधिवेशन आयोजक कमिटीको बैठकबाट तामाङले पार्टी केन्द्रीय कार्यालय सचिवको जिम्मेवारी पाएका थिए । एमालेमा कार्यालय सचिव महत्वपूर्ण पद हो ।

पूर्वमन्त्री तामाङ प्रतिनिधिसभा पुनःस्थापनाअघि प्रचण्ड-माधव समूह छाडेर केपी ओली पक्षमा लागेका थिए । यसअघि कार्यालय सचिव कृष्णगोपाल श्रेष्ठ थिए ।

२०४७ सालमा ओली एमालेको युवा संगठन तत्कालीन प्रजातान्त्रिक राष्ट्रिय युवा संघका संस्थापक अध्यक्ष हुँदा त्यही युवा संघका कार्यालय सचिव थिए तामाङ।

अहिले ओली पार्टी अध्यक्ष भएका बेला तामाङ पुनः कार्यालय सचिव भएका हुन् ।

प्रतिक्रिया

Leave a Reply

Your email address will not be published. Required fields are marked *