बाइडन र सीबीच पहिलोपटक वार्ता हुँदै, जलवायु परिवर्तनको मुद्दा केन्द्रमा

वासिङ्टन । राष्ट्रपतिय कार्यभार सम्हालेपछि पहिलोपटक अमेरिकी राष्ट्रपति जो बाइडन र चिनियाँ समकक्षी सी जिङपिङबीच विहिबार पहिलोपटक वार्ता हुने भएको छ ।

अमेरिकी निम्तोमा दुई राष्ट्रपतिबीच जलवायु परिवर्तनको मुद्दामा छलफल हुन लागेको हो । बाइडनले अन्य एकदर्जन मुलुकका सरकार एवं राष्ट्रप्रमुखलाई पनि वार्तामा निम्तो दिएका छन् ।

भर्चुअल छलफल विहिबारदेखि सुरु हुने भएको छ । सन् २०१५ को पेरिस सहमति र कार्वन उत्सर्जन कटौतीजस्ता सन्धीमा अमेरिकाको पुनरागमनपछि यस्तो छलफल हुन लागेको हो ।

चिनियाँ विदेश मन्त्रालयका प्रवक्ता हु चिन्याङका अनुसार राष्ट्रपति सीले भिडियोमार्फत महत्वपूर्ण सम्बोधन गर्ने भएका छन् । चीनको मानव अधिकार अवस्थालाई लिएर दुई ठूला अर्थतन्त्र अमेरिका र चीनबीच तनाव चुलिएको बेला यस्तो छलफल हुन लागेको हो ।

गतमहिना अमेरिकी भूभाग अलास्कामा दुई मुलुकका विदेशमन्त्रीबीच छलफल भएपनि कुनै निष्कर्ष निस्किएन । तर, यसैसाता सबैभन्दा बढी कार्बन उत्सर्जन गर्ने यी दुई मुलुकले जलवायु परिवर्तनको मुद्दामा मिलेर काम गर्ने सहमति जुटाएका छन् ।