प्रदेश २ : एमालेमा लागेका माओवादीका चार सांसद पदमुक्त – Nepal Press

प्रदेश २ : एमालेमा लागेका माओवादीका चार सांसद पदमुक्त

जनकपुरधाम । सर्वोच्चबाट नेकपा एकता बदर भएपछि नेकपा माओवादी केन्द्र छाडेर नेकपा एमालेमा गएका प्रदेश-२ सभाका चार सांसद पदमुक्त भएका छन् ।

माओवादी केन्द्रबाट निर्वाचित सांसदहरु रामचन्द्र मण्डल, ज्वाला साह, कुन्दनप्रसाद कुशवाहा र मोहम्मद समीरले एमालेमै बस्ने अडान लिएपछि माओवादीले कारवाही गरेको हो ।

झण्डै ६ महिनापछि बसेको प्रदेश २ सभा बैठकमा सभामुख सरोजकुमार यादवले नेकपा माओवादी केन्द्रले चार सांसदलाई पदमुक्त गरेको पत्र पढेर सुनाएका हुन् ।

शुक्रवार चारै सांसदलाई माओवादी अध्यक्ष पुष्पकमल दाहाल ‘प्रचण्ड’ले दलको विधान र राजनीतिक दल सम्बन्धी ऐनले तोकेको दायित्व जानी जानी उल्लंघन किन गरेको भन्दै २४ घण्टै स्पष्टीकरण सोधेका थिए ।

स्पष्टीकरणको जवाफ नदिएपछि उनीहरू चारैजनालाई सांसद पदबाट मुक्त गरिएको पत्र माओवादीले सभामुखलाई पठाएको थियो ।

राजनीतिक दल सम्बन्धी ऐन २०७३ को दफा ३१ र ३२ को ‘ख’ बमोजिम माओवादी केन्द्र त्याग गरेको देखिएको सभामुख यादवलाई माओवादी केन्द्रले पठाएको पत्रमा भनिएको छ ।

पदमुक्तको खबर पाएपछि उनीहरू चारैजना प्रदेशसभा बैठकमा उपस्थित भएनन् । पदमुक्त भएका मण्डल माओवादी केन्द्रका संसदीय दलका नेता थिए । चारजना पदमुक्त भएपछि प्रदेशसभामा अब माओवादी केन्द्रका ७ जनामात्र बाँकी छन् ।

प्रतिक्रिया

Leave a Reply

Your email address will not be published. Required fields are marked *