संसदीय दलको बैठकमा भाग लिने माधव नेपाल समूहको निर्णय, माधव र भीम रावल नजाने

काठमाडौं । नेकपा एमालेको माधव नेपाल पक्षले पार्टीको संसदीय दलको बैठकमा भाग लिने निर्णय गरेको छ । आज बसेको केन्द्रीय सदस्यहरुको बैठकले सो निर्णय गरेको नेता रघुजी पन्तले जानकारी दिए ।

पन्तका अनुसार ६० जना जति केन्द्रीय सदस्यको बैठकमा सहभागिता थियो । पार्टीभित्रै बसेर विधि र पद्दतिका लागि लड्ने निर्णय भएको उनले जानकारी दिए ।

‘आजको बैठकमा हाम्रा साथीहरू जानुहुन्छ र आफ्नो कुरा राख्नुहुन्छ,’ उनले भने, ‘हामी नेकपा एमालेभित्र बसेर पार्टीलाई बलियो र गतिशील बनाउनका लागि तथा विधि र पद्दतिमा चलाउनका लागि संघर्ष गर्ने निर्णय भएको छ ।’

माधव नेपाल र झलनाथ खनाल पनि बैठकमा सहभागी हुने हो ? भन्ने पत्रकारको जिज्ञासामा पन्तले भने, ‘व्यक्ति को जानु हुन्छ को जानुहुन्न भनेर सोधिएन । कसैको काम परेर नजान पनि सक्नुहुन्छ ।’

तर, दलको बैठकमा माधवकुमार नेपाल र भीम रावल नजाने बताइएको छ ।

अध्यक्ष एवं प्रधानमन्त्री केपी शर्मा ओलीले अहिले ३ बजे बालुवाटारमा एमाले संसदीय दलको बैठक डाकेका छन् ।

यसअघिका नगएको बैठकमा अहिले के को आधारमा एक्कासी जान खोज्नु भो ? भन्ने पत्रकारको प्रश्नको जवाफमा नेता झलनाथ खनालले आफ्नो पार्टीको संसदीय दलको बैठकमा जाने यो निर्णय एक्कासी नभएको प्रष्ट्याए । उनले बालुवाटारमा नभई पार्टीका बैठक पार्टी कार्यालयमा राख्नुपर्ने आफूहरूको माग रहेको अडान राखे ।