यो सरकारसँग सती जाँदैनौं, लगनगाँठो पनि कस्दैनौं : उपेन्द्र यादव

रुपन्देही । जनता समाजवादी पार्टीका अध्यक्ष उपेन्द्र यादवले प्रधानमन्त्री केपी शर्मा ओली नेतृत्वको सरकार बहिर्गमनमात्रै अहिलेको राजनीतिक निकास भएको दाबी गरेका छन् ।

प्रेस मञ्च नेपालले आज बुटवल गरेको पत्रकार भेटघाट कार्यक्रममा उनले लोकतान्त्रिक गणतन्त्र, संघीयता र समावेशी नचाहने सरकार पूर्णरूपमा असफल भएकाले यसको विकल्प खोज्नुपर्ने बताए ।

सत्तासमीकरणमा सरकारसँग सती जान नसक्ने र कुनै लगनगाँठो पनि नबाँध्ने उनको भनाइ थियो । अध्यक्ष यादवले भने, ‘सरकारले संसदलाई कामबिहिन बनायो । कुनै विजनेस दिएको छैन । संसद असफल बनाउने खेलमा लागेको छ । फेरि संसद विघटन गर्न सरकार लागि परेको छ ।

पार्टीका राजबन्दी रिहाइका लागि सरकारसँग वार्ता भइरहेको विषयलाई सत्ता साझेदारीका रुपमा व्याख्या गरिएको उनको टिप्पणी छ ।

‘रेशम चौधरीको रिहाइ भनेको राजबन्दीसम्बन्धी मुद्दा हो उनको रिहाइ हुनुपर्छ, तर सरकारले उनको रिहाइलाई सत्ता साझेदारीको शर्तका रूपमा व्याख्या गरेर भ्रम सिर्जना गरेको छ । जसपा उक्त मुद्दालाई सत्ताको भर्‍याङ बनाउँदैन,’ यादवले भने, ‘राजनीतिक अभियोग र राजनीति फरक कुरा हो ।’

पछिल्लो समय सत्ता समीकरणबारे जसपाभित्रका केही व्यक्ति लागे पनि ती असफल हुने यादवले बताए । उनले भने, ‘जसपाको स्पष्ट लाइन हो, वर्तमान सरकारसँग कुनै सहकार्य, साझेदारी हुँदैन ।’

प्रतिक्रिया

Leave a Reply

Your email address will not be published. Required fields are marked *