अष्ट्रेलियामा बाढीको वितण्डा : १८ हजार बासिन्दा विस्थापित, सिड्नी डुबानमा

अष्ट्रेलियाली राज्य साउथ वेल्सको पूर्वी कोस्टमा आएको भीषण बाढीबाट प्रभावित १८,००० भन्दा मानिसलाई सुरक्षित थलोमा उद्दार गरिएको छ ।

राज्यको राजधानी सिड्नीसहित दक्षिण-पूर्वी क्वीन्सल्यान्डमा परेको भारी वर्षाले नदीमा बाढी आएको हो । बाढीको कारण बाँधबाट पानी भरिएर सिड्नी वरपरको बस्तीमा पुगेको छ ।

५० वर्षमा एकपटक हुने भनिएको यो प्राकृतिक विपत्ति अझै एकसाता कायम रहने र यसबाट सजग हुन सरकारले त्यहाँका बासिन्दालाई आग्रह गरेको छ ।

प्रधानमन्त्री स्कट मरिसनले विस्थापित हुन बाध्य नागरिकलाई राहतको व्यवस्था गर्ने बताएका छन् । न्यू साउथ वेल्स राज्यका प्रमुख ग्लाडेस बर्जिकिलनका अनुसार सोमबार कुनैपनि मृत्यु भएको छैन ।

अष्ट्रेलियाको २५ मिलियन जनसंख्या बसोबास गर्ने प्रभावित क्षेत्रको संरचना क्षति पुर्‍याएको बीबीसीले जनाएको छ । अघिल्लो हिउँदमा भएको आगलागी र सुख्खाले प्रभावित बासिन्दालाई बाढीले झनै पीडा दिएको जनाइएको छ ।