बेल्जियम, लक्जेमवर्ग र नेदरल्यान्ड्सपछि स्पेनमा पनि इच्छामृत्युलाई कानूनी मान्यता

एजेन्सी । स्पेनको संसदले बिहीबार स्वैच्छिक मरण अर्थात इच्छामृत्युलाई कानूनी मान्यता दिएको छ। संसदमा भएको मतदानमा इच्छामृत्युको पक्षमा २ सय २ मत आयो भने विपक्षमा १ सय ४१ मत आएको थियो।

स्पेनको तल्लो सदनमा भएको मतदान प्रक्रियामा २ जना सांसद अनुपस्थित थिए । हाल स्पेनको कानूनमा स्वेच्छिक मरण वा स्वेच्छिक मरणमा सहयोग गर्नेलाइ १० बर्ष कैद सजाय छ।

‘आजदेखि हामी अधिक मावनीय, निश्पक्ष र स्वतन्त्र देश बनेका छौं,’ मतदानपछि स्पेनिस प्रधानमन्त्री पेड्रो सान्चेसले ट्वीट गरेका छन्, ‘नागरिक स्तरबाट ब्यापक रुपमा माग भएको इच्छामृत्यु कानून अन्तिममा वास्तविकता बनेको छ ।’

स्पेनमा सन २०१९ मा भएको एक सर्भेक्षणले ९० प्रतिशत नागरिक इच्छामृत्युको पक्षमा भएको देखिएको अन्तर्राष्ट्रिय संचार माध्यमहरुले उल्लेख गरेका छन् ।

युरोपमा स्पेन अगाडि बेल्जियम, लक्जमबर्ग र नेदरल्यान्ड्सले इच्छामृत्युलाई कानुनी मान्यता दिइसकेका छन् ।