विप्लवसँग वार्ता– कांग्रेसको स्वागत, प्रचण्ड माधव पक्षको प्रश्न (भिडियो) – Nepal Press

विप्लवसँग वार्ता– कांग्रेसको स्वागत, प्रचण्ड माधव पक्षको प्रश्न (भिडियो)

काठमाडौं । नेत्रविक्रम चन्द ‘विप्लव’ नेतृत्वको नेकपासँग वार्ता गर्ने सरकारको निर्णयलाई प्रमुख प्रतिपक्षी दल नेपाली कांग्रेसले स्वागत गरेको छ । सरकारले विप्लव नेतृत्वकाे नेकपासँग वार्ता गर्न गृहमन्त्री रामबहादुर थापाको नेतृत्वमा वार्ता टोली गठन गर्नु सकारात्मक भएको कांग्रेस प्रवक्ता विश्वप्रकाश शर्माले बताए ।

वार्ता सकारात्मक भए पनि सरकार र विप्लव  नेतृत्वकाे नेकपा दुवैले प्रचार वा शक्तिसञ्चयको विषय बनाउन नहुने शर्माको भनाइ छ । ‘शान्तिपूर्ण राजनीति नै निकास हो । त्यसका लागि सार्थक पहल भएको हो भने स्वागतयोग्य छ । तर प्रचारबाजी गर्ने र शक्तिसञ्चय गर्ने प्रयास मात्रै हो भने त्यसको परिणाम सुखद हुनेछैन’, शर्माले भने ।

त्यस्तै नेकपा प्रचण्ड–माधव पक्षका नेता गंगालाल तुलाधरले भने सरकारले समस्या समाधान गर्न नभई रणनीतिक रुपमा वार्ताको ‘प्रपञ्च’ रचिएको बताए । संसद विघटनको कदम असफल भइसकेपछि जनताको ध्यान मोड्न प्रधानमन्त्रीले नयाँ प्रयोग गरेको तुलाधरको टिप्पणी छ ।

‘बृहत्तर शान्तिको पक्षमा हो भने हामी सबै खुशी हुन्छौं तर यो वार्ता एक प्रपञ्च हो जस्तो लाग्दैछ । आफ्नो असफलता छोप्न शान्तिप्रक्रियाको प्रपञ्च गरिएको हो भन्ने लाग्छ’, तुलाधरले भने ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर