नेपथ्य गीत ‘जोमसोमै बजार’का गीतकारको अमेरिकामा निधन

न्यूयोर्क । नेपथ्य ब्यान्डको चर्चित गीत ‘जोमसोमै बजार’का गीतकार विश्व थकालीको हृदयघातका कारण अमेरिकामा निधन भएको छ ।

गत शुक्रबार उनको निधन भएको जनाइएको छ । अमेरिकाको नर्थ क्यारोलिनामा उनले रेष्टुरेन्ट व्यवसाय संचालन गर्दै आएका थिए ।

मुस्ताङमा जन्मिएका थकालीको ५१ वर्षको उमेरमा निधन भएको हो । रेष्टुरेन्टको काम सकेर उनी राती बाथरुम गएका थिए र धेरैबेरसम्म नफर्किएपछि उनी लडिरहेको अवस्थामा भेटिएका थिए ।

नेपथ्यको यो चर्चित गीत अहिलेसम्म कालजयी मानिन्छ । १२ बजेपछि हावा चल्ने भएकाले जोमसोमको सौन्दर्यलाई परिकल्पना गरेर उनले जोमसोममै रहेर उक्त गीत लेखेका थिए ।

मुस्ताङको घरपझोङ-४, जोमसोममा पुख्र्यौंली घर रहेका उनी लामो समयदेखि अमेरिकामा बस्दै आएका थिए । थकालीको मंगलबार अमेरिकामा अन्त्येष्ठी गरिने भएको छ ।