प्रचण्ड-माधव पक्षीय नेकपा संसदीय दलको बैठक बस्दै

काठमाडौं । विभाजित नेकपाको प्रचण्ड-माधव नेपाल पक्षले आजै संसदीय दलको बैठक बोलाएको छ । अपरान्ह ४ बजे दलको बैठक बोलाइएको पुनःस्थापित प्रतिनिधिसभाका सदस्य झपट रावलले बताए ।

प्रतिनिधिसभा पुनःस्थापनापछि अबको कदमबारे सांसदहरुलाई जानकारी गराउन बैठक बोलाइएको हो । प्रतिनिधिसभा विघटनपछि प्रचण्ड माधव पक्षले दलको नेताबाट केपी ओलीलाई हटाएको घोषणा गर्दै प्रचण्डलाई नेता चयन गरेको थियो ।

कानुनी रुपमा नेकपा विभाजन भइनसकेकाले दलको नेताबाट ओलीलाई हटाउने हो भने पनि प्रचण्ड माधव पक्षले वैधानिक प्रक्रियामा जानुपर्ने हुन्छ । त्यसबारे पनि बैठकमा छलफल हुनसक्ने अर्का सांसद कृष्णभक्त पोखरेलले बताए ।

पुनःस्थापित प्रतिनिधिसभामा प्रचण्ड-माधव पक्षका सांसद कति छन् भन्ने पनि आजको बैठकबाट थाहा हुनेछ ।