नेकपा एकताको पक्षमा केन्द्रीय सदस्य विष्णु रिजालको अपील

काठमाडौं । नेकपा प्रचण्ड-माधव पक्षका केन्द्रीय सदस्य तथा विदेश विभाग उप–प्रमुख विष्णु रिजालले पछिल्ला राजनीतिक तिक्तता बिर्सेर पुरानै नेकपाको एकताका लागि नेता कार्यकर्तामा अपील गरेका छन् ।

घटनाक्रमबाट पाठ सिक्दै सबै नेताले आ-आफ्ना सीमा र सबलता बुझ्न सकियो भने नेकपा पुनः एकीकृत भएर अघि बढ्न सक्ने नेता रिजालको विश्वास छ । आज बिहान सामाजिक सन्जाल फेसबुकमार्फत उनले सर्वोच्च अदालतको फैसला र निर्वाचन आयोगको अलमलताले नेताहरुलाई पुनः एकपल्ट ठन्डा दिमागले सोच्ने मौका दिएको बताएका छन् ।

नेकपाको औपचारिक विभाजन भइनसकेकाले पुनःएकता सम्भव रहेको इंगित गर्दै उनले लेखेका छन्, ‘धेरै बिग्रिए पनि अन्तिम पटाक्षेप हुन बाँकी छ । एकताका लागि आ-आफ्नो ठाउँबाट सोच्ने र योगदान गर्ने समय आएको छ । आवेग, उत्तेजना र अहम् क्षणिक हुन् भने देश, पार्टी र युवा पुस्ताको भविष्य दीर्घकालीन हो ।’

उनले एकता विथोलिएको देखे-भोगेका नेता कार्यकर्ताले नै भोलिका दिनमा सजगतापूर्वक एकता बचाउन सक्ने भन्दै हारेको सिपाहीले सजगतापूर्वक युद्ध लड्ने तर्क प्रस्तुत गरेका छन् ।