चितवनबाट प्रचण्डले भने- राजनीतिक दलहरूसँग समझदारी बनाएर जान्छौं

काठमाडौं । विभाजित नेपाल कम्युनिष्ट पार्टी (प्रचण्ड-माधव पक्ष) का अध्यक्ष पुष्पकमल दाहाल ‘प्रचण्ड’ले अब सबै राजनीतिक दलसँग समझदारी बनाएर अघि बढ्ने बताएका छन् ।

सर्वोच्च अदालतको फैसलापछि चितवनबाट प्रतिक्रिया दिंदै दाहालले भने, ‘अब हामी राजनीतिक दलहरुसँग समझदारी बनाएर जान्छौं ।’

प्रचण्डले चितवनमा गरेको सम्बोधनको बुँदागत अंश :

देशभरिका सबै पार्टींलाई आआफ्नो ढंगले विजय र्‍यालीका रूपमा मनाउन आग्रह गर्दछु ।

बौद्धिक समुदाय, न्यायिक क्षेत्रमा काम गर्ने, पत्रकार सबैको विजय हो । न्यायाधीशहरूको साहसिक फैसला हो, म उहाँहरूलाई पनि बधाई दिन चाहन्छु ।

जसले प्रधानमन्त्रीको कदमलाई असंवैधानिक भने ती सबैलाई बधाई भन्न चाहन्छु । अब हामी राजनीतिक दलहरूसँग समझदारी बनाएर जान्छौं ।

केपी ओलीको भ्रममा रहेका सबै पार्टीका साथीहरूलाई भ्रममुक्त हुन अपील गर्न चाहन्छु ।

केपी ओलीजी यदि तपाईंमा अलिकति पनि लाजशरम छ भने राजीनामा दिनुहोस् ।