म्यानचेस्टर सिटीको लयमा प्रशिक्षक ग्वार्डिओला नै आश्चर्यचकित – Nepal Press

म्यानचेस्टर सिटीको लयमा प्रशिक्षक ग्वार्डिओला नै आश्चर्यचकित

एजेन्सी । म्यानचेस्टर सिटीका प्रशिक्षक पेप ग्वार्डिओलाले सम्पूर्ण विश्व फुटबल नै प्रभावित भएको समयमा टोलीको लय देखेर आश्चर्यचकित भएको बताएका छन् ।

गएराति आर्सनलमाथि १–० को जितसहित इंग्लिस प्रिमियर लिगको शीर्ष स्थानमा रहेको सिटीले लगातार जितयात्रालाई १८ खेलसम्म पु¥याएको छ ।

सिटीले डिसेम्बर १५ यता सबै प्रतियोगितामा गरी खेलेका कुनै पनि खेलमा पराजित हुनुपरेको छैन । प्रिमियर लिगमा १३ खेल बाँकी रहँदा उसले स्पष्ट १० अंकको अग्रता यथावत राखेको छ ।

कोरोना महामारीका कारण व्यस्त खेलतालिकासँगै अन्य टोलीलाई चोटले ठूलो असर गरिरहेको देखिन्छ । अन्य टोलीहरु नियमित लयमा नभएको फाइदा सिटीले उठाइरहेको छ ।

‘यो सबैमा विश्वभरिका क्लबहरु प्रभावित छन्, उनीहरुले अंक गुमाइरहेका छन् । तर म आश्चर्यचकित र उत्साहित पनि छु कि हामी पछिल्लो २ महिनादेखि लगातार एकरुपको प्रदर्शन दिन सकिरहेका छौं । मैले टिमबाट अपेक्षा गरेभन्दा धेरै पाएको छु,’ ग्वार्डिओलाले भने, ‘मानिसहरु कीर्तिमान र उपाधिबारेका कुरा गरिरहन्छन् । तर त्यसका लागि तपाईंले यस्ता जितहरु धेरैपल्ट जित्नुपर्ने हुन्छ ।’

प्रतिक्रिया

Leave a Reply

Your email address will not be published. Required fields are marked *