‘पिके’ सिक्वेलमा आमिर र रणवीर सँगै देखिने, निर्माताले गरे सिक्वेल घोषणा

काठमाडौं । आमिर खान र राजकुमार हिरानीको सहकार्य रहेको चर्चित फिल्म ‘पिके’को सिक्वेल बन्ने भएको छ । सन् २०१४ को फिल्ममा आमिर पृथ्वीमा रणवीर कपुरसँगै फर्किएको दृश्यसँगै फिल्म सकिएको थियो ।

यो दृश्यसँगै दर्शकले दोस्रो श्रृंखला आउने आशा राखेका थिए । दर्शकले दुबै स्टारलाई सिक्वेलमा सँगै हेर्न पनि चाहेका थिए । यो पर्खाइ सकिएको छ र निर्माता विधुविनोद चोपडाले सिक्वेल निर्माणको घोषणा गरेका छन् ।

अहिले स्क्रिप्ट लेखनको काम भैरहेको र सकिए लगत्तै निर्माण सुरु हुने चोपडाले भारतीय अनलाइन मिड–डेलाई जानकारी दिए । विधुविनोदले भने, ‘हामी पैसा कमाउने व्यवसायमा छैनौं । हामी फिल्मको ब्यवसाय गरिरहेका छौं । पैसा कमाउनै परे मुन्ना भाइका छ–सात सिक्वेल बनिसक्थे । पिकेका केही सिक्वेल बनिसक्थे ।’

यसबीच हिरानीले रणवीर कपुरलाई लिएर बनाएको फिल्म सन्जु बक्सअफिसमा ब्लकबस्टर बनेको थियो ।