दुबईकी राजकुमारी आफ्नै पिताद्वारा बन्धक, राष्ट्रसंघलाई हस्तक्षेप गर्न आग्रह

काठमाडौं । दुबईका आमिरकी छोरी राजकुमारी लतिफा अल मकतुम सन् २०१८ मा देशबाट भाग्ने प्रयास गरेकी थिइन् । भाग्ने क्रममा उनलाई पक्राउ गरिएको थियो ।

यसपछि उनले एउटा भिडियो सन्देश साथीलाई पठाएकी थिइन् जहाँ आफ्ना पिताले नै आफूलाई बन्धक बनाएको खुलासा गरेकी थिइन् । भिडियोमा आफू खतरामा रहेको समेत भनिएको थियो ।

प्रिन्सेस लतिफाको नयाँ भिडियो पुनः बाहिरिएको छ जहाँ उनले आफू भाग्ने क्रममा कमान्डोले पक्राउ गरेर हिरासतमा राखेको जनाएकी छिन् । अहिले उनका नयाँ भिडियो आउने क्रम बन्द भएको छ र उनका साथीहरुले राष्ट्रसंघलाई यो मामिलामा हस्तक्षेप गर्न आग्रह गरेका छन् ।

दुबई र संयुक्त अरब इमिरेट्सले यसअघि नै राजकुमारी लतिफाको परिवार सुरक्षित रहेको जनाइसकेका छन् । संयुक्त राष्ट्रसंघका पूर्व मानव अधिकार उच्चायुक्त एवं आयरल्यान्डका पूर्व राष्ट्रपति म्यारी रबिनसनले यो मामिलामा अन्तराष्ट्रिय कारवाहीको माग गरेका छन् ।

लतिफाका पिता शेख मोहम्मद बिन राशिद अल मकतुम संसारका धनी राष्ट्राध्यक्षमध्ये एक हुन् । उनी दुबईका शासक र युएईका उपराष्ट्रपति समेत हुन् ।