आजबाट एमिकस क्युरीले राय दिने, फैसला फागुन दोस्रो साताभित्रै

काठमाडौं । प्रतिनिधिसभा विघटनविरुद्धको मुद्दाको सुनुवाई अन्तिम चरणमा पुगेको छ । संवैधानिक इजलासमा पक्ष र विपक्षका वकिलहरुको वहस तथा रिट निवेदक पक्षको जवाफी बहस सकिएपछि आजबाट एमिकस क्युरीका तर्फबाट राय दिने क्रम शुरु हुँदैछ ।

सर्वोच्च अदालतले प्रतिनिधिसभा विघटनविरुद्धको मुद्दामा संवैधानिक इजलासलाई राय दिन ५ सदस्यीय एमिकस क्युरी मागेको थियो । जस अनुसार नेपाल बार एशोसियसनबाट ३ जना र सर्वोच्च अदालत बार एशोसियसनबाट २ जना वकिल एमिकस क्युरीमा छन्

बार एशोसियसनबाट गएका बद्रीवहादुर कार्की, विजयकान्त मैनाली र सतीशकृष्ण खरेल तथा सर्वोच्च बारबाट गएका पूर्णमान शाक्य र गीता संग्रौलाको एमिकस क्युयरीले राय दिएपछि फैसलाको चरणमा पुग्नेछ ।

एमिकस क्युरी इजलासको सहयोगी हो तर उसले दिएको राय अनुसार फैसला हुनुपर्छ भन्ने चाहिँ छैन । संवैधानिक इजलासमा एमिकस क्युरीको बहसपछि ढिलोमा फागुन दोस्रो सातासम्म फैसला आउने सम्भावना छ ।

प्रधानन्यायाधीश चोलेन्द्र शमसेर जबरा अध्यक्षताको संवैधानिक इजलासमा न्यायाधीशहरु विश्वम्भरप्रसाद श्रेष्ठ,अनिलकुमार सिन्हा, सपना मल्ल प्रधान र तेजवहादुर केसी सदस्य छन् ।

प्रतिनिधिसभा विघटन भएको भोलि फागुन ५ गते २ महिना पुग्दैछ । सरकारले निर्वाचनको मिति वैशाख १७ र २७ गतेलाई तोकेको हुनाले फैसला गर्न अदालतले अब बढीमा डेढ साता लगाउने अनुमान गरिएको छ ।

याे पनि पढ्नुस्

के हो एमिकस क्युरी ?