देउवाले मागे निर्वाचन कार्यतालिका – Nepal Press

देउवाले मागे निर्वाचन कार्यतालिका

सूर्य चिन्ह ओलीले कि प्रचण्डले पाउने छिटो फैसला होस्

काठमाडौं । नेपाली कांग्रेसका सभापति शेरबहादुर देउवाले निर्वाचन कार्यतालिका तत्काल सार्वजनिक गर्न माग गरेका छन् ।

प्रधानमन्त्रीले संसद विघटन गरेर चुनावको मिति तोकेपनि निर्वाचन आयोगले ढिलासुस्ती गरिरहेको आरोप लगाउँदै सभापति देउवाले निर्वाचन गर्ने हो भने तयारी तीब्र बनाउनुपर्ने बताए ।

‘प्रधानमन्त्रीले संसद विघटन गरेर बैशाखमा चुनाव गराउँछु भन्ने आयोगले तालिकासमेत नबनाउने । संसद विघटनको ६ महिनाभित्र चुनाव गराउनुपर्ने कुरा संविधानमै छ । आयोगलाई थाहा छ कि छैन ?’, देउवाले प्रश्न गरे ।

निर्वाचन आयोगले नेकपाभित्रको झगडाबारे पनि छिटो निष्कर्ष दिनुपर्ने देउवाको भनाइ छ । ‘सूर्य चिन्ह एउटै छ । नेकपामा ओलीले पाउने कि प्रचण्डले निर्वाचन आयोगले छिटो फैसला दिनुपर्‍यो’, देउवाले भने ।

आयोगप्रति आक्रोशित देखिएका देउवाले तयारी तीव्र बनाउनुको विकल्प नभएको बताए । ‘अदालतले पुनःस्थापना गरेपनि मञ्जुर छ चुनावमा जान भनेपनि मञ्जुर छ । तर आयोगले त आफ्नो काम गर्नुपर्‍यो नि’, देउवाले भने ।

संसद विघटन गलत कदम भएपनि अदालतलाई सडकबाट आदेश दिने पक्षमा आफू नरहेको भन्दै सभापति देउवाले कांग्रेसले संविधान र न्यायालयको सम्मान गर्ने बताए ।

प्रतिक्रिया

Leave a Reply

Your email address will not be published.

सम्बन्धित खवर