सर्वोच्च अदालतका मुख्य रजिष्ट्रारमा कुँवर र रजिष्ट्रारमा पौडेल नियुक्त – Nepal Press

सर्वोच्च अदालतका मुख्य रजिष्ट्रारमा कुँवर र रजिष्ट्रारमा पौडेल नियुक्त

काठमाडौं । सर्वोच्च अदालतको मुख्य रजिष्ट्रारमा लालबहादुर कुँवर नियुक्त भएका छन् ।

तत्कालीन मुख्य रजिष्ट्रार नृपध्वज निरौला मुख्य न्यायाधीशमा नियुक्त भएपछि रिक्त रहेको मुख्यरजिष्ट्रार पदमा सर्वोच्च अदालतका रजिष्ट्रार कुँवरलाई नियुक्त गरिएको हो ।

माघ २५ गते बसेको न्याय सेवा आयोगको बैठकले कुँवरलाई नियुक्तिको सिफारिस गरेपछि गत माघ २९ गते बसेको मन्त्रिपरिषद्को बैठकले कुँवरलाई मुख्य रजिष्ट्रारमा नियुक्ति गर्ने निर्णय गरेको हो ।

गुल्मीको धुर्कोटमा २०२९ सालमा जन्मिएका कुँवर २०५५ सालमा शाखा अधिकृतबाट निजामती सेवामा प्रवेश गरेका थिए ।

यस्तै सर्वोच्च अदालतको रिक्त एकजना रजिष्ट्रारमा निर्मला पौडेललाई नियुक्त गरिएको छ । माघ २९ कै मन्त्रिपरिषद्को बैठकले पौडेललाई सर्वोच्च अदालतको रजिष्ट्रारमा नियुक्त गरेको हो । पौडेल सर्वोच्च अदालतको रजिष्ट्रारमा पुग्ने पहिलो महिला हुन् ।

यसअघि पौडेल प्रशासकीय अदालतको रजिष्ट्रार (सहरजिष्ट्रार) थिइन् । २०२४ सालमा विराटनगरमा जन्मिएकी पौडेल २०५२ मंसिरबाट शाखा अधिकृतबाट प्रवेश गरेकी थिइन् ।

प्रतिक्रिया

Leave a Reply

Your email address will not be published.