भ्यालेन्टाइन, रातो गुलाब र प्रणय जोडीहरु ! – Nepal Press

भ्यालेन्टाइन, रातो गुलाब र प्रणय जोडीहरु !

काठमाडौं । दरबार मार्गको राइजिङ मल अगाडि मिना तामाङ श्रेष्ठको ‘रोयल ड्याफोडिल फ्लावर सप’ छ । बिहान करिब ९ बजेतिर हामी पुग्दा उनी गुलाबको हाँगालाई काँटछाँट र स्प्रे छरेर ताजा तुल्याउन व्यस्त थिइन् । पसलमा केही तन्नेरी फूल छान्दै थिए ।

अबको एक साता मीनाको दैनिकी रातो गुलाबको फूलको बेचविखनमा बित्नेछ । आफ्नो पसल आगामी एकसाता गुलाबमा प्रेम साट्न चाहने तन्नेरीले भरिनेमा उनी ढुक्क छिन् । गुलाबको फूल खरिद गर्न किशोर-किशोरीहरु आइतबार बिहानैदेखि उनको पसलमा झुम्मिन थालिसकेका छन् ।

कुनै बेला थियो मीनाले एउटै भ्यालेन्टाइन सिजनमा चार लाख रुपैयाँसम्मका गूलाब बेचिन् । कमलादीका अन्य थलोमा अर्किड पसल खुल्न थालेपछि, उनको पसलमा ब्यापारमा कमी आयो । ‘जतासुकै पसल खुलेपछि अहिले १ लाख फूल बेच्न पनि कठिन होलाजस्तो छ’ मीना भन्छिन् ।

यसको अर्थ प्रेम गर्नेहरु घटेका भने होइनन् । बरु, फूल किन्नेहरुको गन्तव्य विभाजित भएको हो । फूलको माग त वर्षेनी बढिरहेको छ । यो भ्यालेन्टाइन सिजनका लागि भारतबाट १ करोड फूलको आयात गरिएको नेपाल फ्लोरिकल्चर एसोसिएसनले जनाएको छ ।

प्रणय दिवसको छेकोमा प्राय ‘रोमान्टिक’ मुडमा हुन्छ कमलादी । किशोर–किशोरीदेखि युवावयका प्रेमी गूलाबको फुलको खोजीमा हुन्छन् । कोही लजाउँदै, लुक्दै किन्छन् त कोही निर्धक्क । कमलादीका अर्किड पसलले भ्यालेन्टाइन डे लक्षित गूलाब फूल, गिफ्ट कार्ड र चकलेट विक्री थालेका छन् ।

पछिल्लो समय सहरी युवापुस्तामाझ प्रेम दिवसले ब्यापकता पाइरहेको छ । एक सातासम्मै प्रेमदिवस मनाउने ट्रेन्ड सुरु भएको छ । ७ फेब्रुअरीमा रोज डे, त्यसपछि क्रमशः प्रपोज डे, चकलेट डे, टेडी डे, प्रमिस डे, हग डे, किस डे र १४ तारिखमा भ्यालेन्टाइन्स डे मनाउन पश्चिमा चलनको सिको नेपालमा पनि गर्न थालिएको छ । आज भ्यालेन्टाइन विकको पहिलो दिन अर्थात् रोज डे थियो ।

यसरी मनाउन थालियो भ्यालेन्टाइन
तेस्रो शताब्दीको रोमन साम्राज्यमा प्रेम गरेबापत फाँसीको सजाय दिइएका सन्त भ्यालेन्टाइनको स्मरणमा संसारभर ‘भ्यालेन्टाइन्स डे’ मनाउने गरिन्छ । पश्चिमेली समाजमा सन्त भ्यालेन्टाइनलाई प्रेमका शहीदको रुपमा लिइन्छ । जेलमा रहेका एक बन्दीकी छोरीलाई दृष्टि प्रदान गरेको भन्दै रोमन साम्राज्यमा उनलाई सजाय दिइएको थियो ।

फाँसी पाउनुअघि सन्त भ्यालेन्टाइनले प्रेमिकालाई गुडबाइ भन्दै पत्र पनि लेखेका थिए । अर्को एक किम्बदन्तीअनुसार सन्त भ्यालेन्टाइनले विहे गर्न बर्जित क्रिस्चियन महिला सैनिकसँग विहे गरेका थिए । १८ औं शताब्दीमा इङ्ल्यान्डबाट सन्त भ्यालेन्टाइनको स्मरणमा प्रेमजोडीले प्रेम अभिव्यक्त गर्दै भ्यालेन्टाइन मनाउन थाले । उनीहरुले फूल, चलकेट र ग्रिटिङ्स कार्डका उपहार मनपर्ने मान्छेलाई पठाउँदै भ्यालेन्टाइन मनाउन गर्थे । त्यसपछि संसारभर फेब्रुअरी १४ मा प्रेम दिवस मनाउन थालियो ।

यसरी राख्नूस प्रेम प्रस्ताव
धेरैका लागि भ्यालेन्टाइन्स डे प्रेम व्यक्त गर्ने मौसम पनि हो । धेरैका लागि आफूले मनपराएको व्यक्तिलाई प्रेम प्रस्ताव गर्न अरुबेला हिम्मत नजुटाएकाहरुले भ्यालेन्टाइन डेलाई उपयोग गर्छन् । मनोविदले प्रेमप्रस्ताव राख्ने केही शैलीको चर्चा पनि गरेका छन् । जस्तैः

  • एउटा फेक आइडीबाट प्रेमी वा प्रेमिकालाई आजको पाँच दिनपछि तिमीलाई एउटा सरप्राइज मिल्दैछ भनेर एउटा सन्देश पठाउनुस ।
  • कलेज वा अफिसको क्यान्टिनमा प्रेमी वा प्रेमिकालाई लिएर जानूस । पहिले नै क्यान्टिनमा काम गर्ने वेटरलाई बताउनूस कि उनी मेरी प्रेमिका-प्रेमी हुन् । उनले अर्डर गरेको बिलमा एउटा प्रपोज सन्देश लेखेर पठाउन सक्नुहुन्छ ।
  • आफ्नो र उनको एउटा तस्विर कोलाज बनाएर एक रोमान्टिक म्यासेज लेख्नूस र पठाउनेको नाममा भगवान चाहन्छन् भनेर लेख्नूस । यसलाई आफूले प्रस्ताव गर्दा (प्रपोज गर्दा) पनि दिनूस ।
  • आफ्नो क्रसलाई प्रपोज गर्दै एक भिडियो बनाउनूस । तपाइँ त्यसलाई युट्युवमा पनि पोस्ट गर्न सक्नुहुन्छ । त्यो लिंकलाई क्रसको इमेलमा पठाउन सक्नुहुन्छ ।
  • एउटा सेतो टिसर्टमा आइ लभ यू वा अन्य कुनै आकर्षक सन्देश पनि लेख्न सक्नुहुन्छ । लेखेको भागलाई छोप्नूस । मायालुलाई एकान्तमा बोलाउनूस र मुस्कान छाड्दै सर्ट खोल्नूस र टीसर्ट देखाउनूस ।

महामारीमा कसरी भ्यालेन्टाइन मनाउने ?
मायालु जोडीले रोमान्टिक डिनर गर्नूस । भान्समा सँगै समय बिताउनूस र खाना सँगै बनाउनूस । महामारी-मैत्री बन्नको लागि ग्रोसरी चीज अर्डर गर्दा गूलाबको फूल पनि मगाउन नभुल्नूस । घरमै खाना पकाउने मुड छैन भने रेष्टुराँमा गएर मनपर्ने डिस पनि अर्डर गर्न सक्नुहुन्छ ।

-घरमा सँगै बसेर रोमान्टिक फिल्म पनि हेर्न सक्नुहुन्छ । आफ्नो अनुकूलता अनुसार रोमान्टिक फिल्मको नाइट सो हेर्न हलमा पनि जान सक्नुहुन्छ । एकअर्कोलाई प्रेम पत्र पनि लेख्न सक्नुहुन्छ । मैनबत्तिको प्रकाशमा संगीत सुन्दै तपाइँले आफ्नो पार्टनरको लागि पत्र पनि लेख्न सक्नुहुन्छ ।

-आउटडोर डेटिङमा पनि जान सक्नुहुन्छ । तपाइँ पिकनिक पार्क, हाइकिङ जाँदा देखिने रोमान्टिक थलो र आफूलाई रमाइलो लाग्ने कुनै ठाउँमा तपाइँ गएर डेट गर्न सक्नुहुन्छ । मायालुलाई एउटा सरप्राइज गिफ्ट दिनूस र जुम मिटिङमा आएर देखाउनुस । मायालुको लागि महंगो उपहार जरुरी छैन ।

-सामाजिक संजाल र इन्टरनेट अफ गरेर तपाइँले एकअर्काको लागि समय बिताउन सक्नुहुन्छ । यसो गर्दा एकले अर्कोलाई बुझ्न र महसुस गर्न सजिलो हुन्छ । सामाजिक संजालमा आउने कुराले ध्यान विकेन्द्रित गर्न सक्ने भएकाले तपाइँले सकेसम्म मोबाइललाई साइलेन्समै राखे राम्रो ।

-भ्यालेन्टाइन्स डे मनाउँदा कुनै तनाव र चिन्ता नलिनूस । विगतलाई बिर्सनूस र वर्तमानमा बाँच्नूस ।

केही किस्सा
भ्यालेन्टाइन डे आफैमा एउटा रोमान्टिक दिन हो । मायालुका लागि यो दिनलाई उत्तम साइतको रुपमा लिने गरिन्छ । पछिल्लो समय मायालु जोडीका लागि भ्यालेन्टाइन डे दशैंजस्तै प्रतीत हुन थालेको छ । संसारमा भ्यालेन्टाइनलाई लिएर केही रमाइला किस्सा पनि छन् ।

  • नाटककार सेक्सपियरको चर्चित लभस्टोरी रोमियो एन्ड जुलियटकी मुख्य महिला पात्र जुलियटको घरमा हरेक वर्षको भ्यालेन्टाइन डेमा हजारौं चिठी पठाइन्छन् । इटालीमा जुलियटको काल्पनिक गाउँ छ र भ्यालेन्टाइन डेमा जुलियटलाई सम्बोधन गदै उक्त गाउँमा प्रेमपत्र पठाइन्छ ।
  • यस दिन विश्वमा औषत अढाइ लाख मान्छेले पार्टनरलाई विहेको प्रस्ताव राख्छन् । १ अर्ब भन्दा बढी कार्ड आदानप्रदान हुन्छन् । अंग्रेजी नयाँ वर्ष र क्रिसमसपछि सर्वाधिक कार्ड आदानप्रदान हुने दिन पनि यही हो । अमेरिकामा मात्रै भ्यालेन्टाइनमा १ अर्ब डलर बराबरको चकलेट विक्री हुन्छ । मुटु आकारका साढे तीन करोड चकलेट बक्स बिक्री हुन्छन् । अमेरिकामै १९ करोड बराबरको गुलाबको फूल विक्री हुन्छ ।
  • गूलाबको फूललाई इटालीको रोममा प्रेमकी देवीको मनपर्ने फूल पनि मानिन्छ । भ्यालेन्टाइ डेमा गुलाब खरिद गर्नेमा ७५ प्रतिशत पुरुष हुन्छन् । भ्यालेन्टाइन गिफ्ट खरिद गर्नेमा ८५ जना महिला हुन्छन् ।
प्रतिक्रिया

Leave a Reply

Your email address will not be published.