सैन्य ‘कू’ पछाडि म्यानमारमा चिनियाँ प्रभाव अझै बढ्न सक्छ : जापानी सहायक रक्षामन्त्री

काठमाडौं । जापानका सहायक प्रतिरक्षामन्त्री यासुदे नाकायुमाले सैन्यू कू पछाडि म्यानमारमा चिनियाँ प्रभाव अझै बढ्ने आशंका व्यक्त गरेका छन् ।

जापानका एक प्रभावशाली मन्त्री समेत रहेका नाकायुमाले सैन्य कू पछाडि म्यानमार चीनको पोल्टा जान सक्ने र विश्व लोकतन्त्रका लागि यो घटना जोखिमपूर्ण हुने समेत उनको टिप्पणी छ ।

‘यदि हामीले बेलैमा यो परिस्थितीलाई मिलाउन सकेनौं भने, म्यानमार विश्व लोकतन्त्रबाट अझै टाढिन सक्छ र चिनियाँ पोल्टामा जान सक्छ’ जापान टाइम्ससँगको अन्तर्वार्तामा उनले भनेका छन् ।

आफ्ना पक्षधर मुलुकसँग जापानले वार्ता गरेर यसबारे निष्कर्ष निकाल्नुपर्ने उनको जोड छ । लोकतन्त्रवादी नेतृ आङसाङ सुकी र राष्ट्रपतिलाई पक्राउ गर्दै म्यानमार सेनाले सोमबार सत्ता आफ्नो हातमा लिएको थियो भने एकवर्षका लागि संकटकाल घोषणा गरेको थियो ।

म्यानमारको एउटा प्रमुख आर्थिक साझेदार समेत रहेको जापानले दोस्रो विश्वयुद्धमा उक्त मुलुकलाई नियन्त्रणमा लिएको थियो । जापानले गिरफ्तार भएकाको रिहाइ र लोकतन्त्र पुनर्बहालीको समेत माग गरेको छ ।

यदि म्यानमार सेनाले जापानसँगको आर्थिक साझेदारितालाई अन्त्य गरेर अघि बढेमा चीनको प्रभाव अझै बढ्ने र यो क्षेत्रीय सुरक्षाका लागि खतरा हुने समेत उनले उल्लेख गरेका छन् । चीनको पोल्टामा जाँदा अमेरिका, बेलायत र जापानलाई हानी हुन समेत उनको विश्लेषण छ ।

नाकायुमा जापानमा कट्टर चिनियाँ आलोचकको रुपमा चिनिन्छन् ।