इजलास बस्‍न नभ्याएपछि प्रचण्डविरुद्धको अवहेलना मुद्दामा सुनुवाइ हुन सकेन – Nepal Press

इजलास बस्‍न नभ्याएपछि प्रचण्डविरुद्धको अवहेलना मुद्दामा सुनुवाइ हुन सकेन

काठमाडौं । विभाजित नेकपाका अध्यक्ष तथा पूर्वप्रधानमन्त्री पुष्पकमल दाहाल प्रचण्डको विरुद्ध परेको अदालतको अवहेलना सम्बन्धी मुद्दा इजलास बस्न नभ्याएपछि आज हेर्न नभ्याइनेमा परेको छ । सो मुद्दा न्यायाधीश मनोजकुमार शर्माको एकल इजलासमा तोकिएको थियो । सो मुद्दामाथि सम्भवतः भोलि सुनुवाइ हुनेछ ।

प्रचण्डविरुद्ध अवहेलना मुद्दा चलाउन अधिवक्ता समिर हायुले दिएको निवेदन सोमवार दर्ता भएको थियो । प्रतिनिधिसभा विघटनविरुद्धको मुद्दामा सुनुवाइ भइरहेका बेला न्यायाधीशहरूलाई धम्क्याउने र कथित जनअदालतबाट फैसला गर्नेजस्ता उत्तेजक अभिव्यक्ति दिएको भन्दै हायुले अवहेलना मुद्दा लगाउन माग गरेका हुन् ।

यसअघि प्रधानमन्त्री केपी शर्मा ओली, चार पूर्व प्रधानन्यायाधीश र पूर्व सभामुख दमननाथ ढुंगानाविरुद्धको अवहेलना मुद्दा पनि शर्माकै इजलासमा परेको थियो । सबै विपक्षीलाई बाटोको म्याद बाहेक १५ दिनभित्र लिखित जवाफसहित उपस्थित हुन अदालतले आदेश दिइसकेको छ ।

प्रतिक्रिया

Leave a Reply

Your email address will not be published.

सम्बन्धित खवर