कांग्रेस नेता सिंहको टिप्पणी – प्रधानमन्त्री ओली ज्ञानेन्द्रपथमा

काठमाडौं । नेपाली कांग्रेसका पूर्वमहामन्त्री प्रकाशमान सिंहले प्रधानमन्त्री केपी शर्मा ओली ज्ञानेन्द्र पथमा रहेको आरोप लगाएका छन् ।

कांग्रेसको भ्रातृ संस्थाहरूले सोमबार काठमाडौंमा आयोजना गरेको विरोध सभालाई सम्बोधन गर्दै नेता सिंहले भने, ‘अहिले ओली पनि ज्ञानेन्द्रको पथमा हिँडेर सरकारी स्रोतसाधन दुरुपयोग गरेर जिल्ला-जिल्ला भ्रमण गरिरहेको छ ।’

प्रधानमन्त्री ओलीलाई साहस भए प्रतिनिधिसभामा गएर विश्वास लिन सक्नुपर्ने बताए । ‘उसले सोचे जस्तै सबैले सोच्नुपर्ने, कस्तो हो ? उसमा साहस भए त प्रतिनिधिसभामा गएर विश्वास लिन सक्नुपर्थ्यो,’उनले भने ।

आमजनताले सडकबाट नै असंवैधानिक कदम ठहर गरिसकेपछि ओलीको होस खुल्ने उनले बताए । ‘ज्ञानेन्द्रको होस् राजदरबार छाड्दा खुलेको थियो,’ सिंहले भने, ‘ओलीले बालुवाटार छाडेर जाने दिन आउँदैछ । के यो २१ औं शताब्दी तानाशाहको जमाना हो र ?’