राष्ट्रपति र प्रधानमन्त्रीको ‘सेटिङ’ ले गणतन्त्र धरापमा परेको नेता पौडेलको आरोप

काठमाडौं । नेपाली कांग्रेसका केन्द्रीय सदस्य प्रदीप पौडेलले प्रधानमन्त्री केपी शर्मा ओली गणतन्त्रविरोधी नेता भएको आरोप लगाएका छन् ।

नेपाली कांग्रेस काठमाडौं क्षेत्र नम्बर ६ ले रत्नपार्कमा आयोजना गरेको सभामा बोल्दै नेता पौडेलले गणतन्त्र र संविधान मन नपरेकै कारण प्रधानमन्त्री ओलीले संसद भंग गरेको बताए ।

प्रधानमन्त्री ओली र राष्ट्रपति विद्यादेवी भण्डारीको ‘सेटिङ’ का कारण लोकतन्त्र धरापमा परेको पौडेलको टिप्पणी थियो । ‘संविधानभन्दा माथि बस्न चाहने प्रधानमत्री र राष्ट्रपतिका कारण संविधान धरापमा पार्ने काम भएको छ । पार्टीको किचलो मिलाउन नसकेर जनतालाई दुःख दिने काम भएको छ’, पौडेलले भने ।
लोकतान्त्रिक आन्दोलनका बेला आफूहरु रत्नपार्कमा आन्दोलनका लागि भेला हुँदै गर्दा ओलीले आन्दोलनविरोधी गतिविधि गरेको स्मरण गराउँदै पौडेलले गणतन्त्र जोगाउनकै निम्ति पनि सडक आन्दोलनको विकल्प नभएको बताए ।