लिफ्टिङ गरेर स्वर्गद्वारीमा खानेपानी पुर्‍याउने मन्त्रालयको निर्णय

काठमाडौं । खानेपानी मन्त्रालयले प्युठानको प्रसिद्ध धार्मिकस्थल स्वर्गद्वारीमा रहेको खानेपानीको समस्या समाधानका लागि माडी नदीको पानी लिफ्टीङ गर्ने निर्णय गरेको छ ।

बिहीबार मन्त्रालयमा निर्णय हुनुअघि स्वर्गद्वारीमा रहेको खानेपानी समस्या समाधान सम्वन्धमा खानेपानी मन्त्री मणि थापा, मन्त्रालयका सचिव माधव वेलवासे, विभाग र आयोजनाका प्रमुखसहितको टोलीले स्वर्गद्वारीमा पुगेर छलफल गरेका थिए ।

स्वर्गद्वारी नगरपालिकाका जनप्रतिनिधि, स्वर्गद्वारी आश्रमका प्रतिनिधिहरुसँगको छलफलपछि मन्त्री थापाले लिफ्टिङ गरेर स्वर्गद्वारीमा खानेपानी पु¥याउने निर्णय गरेका हुन् ।

मन्त्रालयले स्वर्गद्वारीको खानेपानी समस्या समाधानका लागि यही वर्ष डीपीआर सक्नेसमेत निर्णय गरेको छ । मन्त्री थापाले आगामी आर्थिक वर्ष नै बजेटको व्यवस्था गरी खानेपानी समस्यालाई सधैंको लागि समाधान गर्ने प्रतिवद्धता जनाए ।

स्वर्गद्वारीमा दैनिक तीन सयको हाराहारीमा धार्मिक पर्यटक पुग्नेगर्छन् । आश्रममा करिब चार सय परिवारको बसोबास छ । आश्रमले त्यहाँ ४ सय ६० वटा भन्दा बढी गाई पाल्दै आएको छ ।

पानीको अभावले मन्दिरको सरसफाईमासमेत समस्या पर्दै आएको थियो । यस्तै भत्तजनलाई खानेपानीको समस्या, त्यहाँ पालिएका गाईलाई समेत खानेपानीको अभाव हुँदै आएको थियो ।