इजलासमा बहस- ताजा त फलफूल, तरकारीमात्र हुन्छ जनादेश होइन

काठमाडौं । वरिष्ठ अधिवक्ता हरिप्रसाद उप्रेतीले जनादेश बासी नभइसकेकोले ताजा जनादेश भन्न नमिल्ने बताएका छन् ।

प्रतिनिधिसभा विघटनविरुद्धको मुद्दामा संवैधानिक इजलासमा जारी सुनुवाइको क्रममा बिहीबार बहस गर्दै उप्रेतीले, ‘ताजा त फलफूल, तरकारी , खानेकुरा पो हुन्छ । जनादेश कसरी ताजा हुन्छ ?’ भनेर प्रश्न गरे ।

संविधानले जनादेश ५ वर्षसम्म ताजै रहने र ५ त्यो अवधिसम्म बासी नहुने व्यवस्था गरेको प्रष्‍ट्याए ।

‘ताजा जनादेश भनेको कहिले हो श्रीमान ? प्रधानमन्त्रीलाई सपथ नलिदै ताजा जनादेश लिन मन लाग्ला । कुनै प्रधानमन्त्रीलाई एक महिनामै ताजा जनादेश लिन मन लाग्ला । श्रीमान यो ताजा जनादेशको घनचक्कर कहिलेसम्म घुमाइरहने ?’, उनले भने, ‘ताजा जनादेश आवश्यक छैन । त्यसैले ताजा जनादेशका लागि विघटन गरिनु संवैधानिक होइन श्रीमान ।’