पहिलो दिन ९ हजार ८४ जनालाई कोरोना खोप, १० घन्टासम्म ‘साइड इफेक्ट’ कसैलाई छैन – Nepal Press

पहिलो दिन ९ हजार ८४ जनालाई कोरोना खोप, १० घन्टासम्म ‘साइड इफेक्ट’ कसैलाई छैन

काठमाडौं । कोभिड–१९ खोप अभियानअन्तर्गत पहिलो दिन खोप लगाएका कसैलाई पनि १० घन्टासम्म साइड इफेक्ट नदेखिएको स्वास्थ्य मन्त्रालयले जनाएको छ । मन्त्रालयका अनुसार पहिलो दिन ९ हजार ८४ जनाले खोप लगाएका छन् ।

प्रदेश १ मा १२५५, प्रदेश २ मा ७२६, बागमतीमा २६ हजार ९४, गण्डकीमा १८ सय ४३, लुम्बिनीमा ७३३ जनाले खोप लगाएका छन् । त्यस्तै कर्णालीमा ७५१ जना र सुदूर पश्चिममा १,०८२ जनाले खोप लगाएका छन् ।

आज सबैभन्दा बढी बाग्मती प्रदेशमा खोप लगाइएको छ भने सबैभन्दा कम प्रदेश २ मा लगाइएको छ । यस्तै काठमाडौंको त्रिभुवन विश्वविद्यालय शिक्षण अस्पताल, वीरेन्द्र सैनिक अस्पताल, पाटन अस्पताल प्रसुती गृह अस्पतालमा रहेको खोप केन्द्रमा प्रधानमन्त्री केपी शर्मा ओलीले स्थलगत भ्रमण गरी खोप लगाउने व्याक्ति र सेवा प्रदायकलाई हौसला दिए ।

आजदेखि देशैभर फ्रन्टलाइनमा खटिएका स्वास्थ्यकर्मी, सुरक्षाकर्मी, तथा सरसफाईकर्मीहरुले कोरोना भाइरसविरुद्धको पहिलो चरणको खोप लगाउन सुरु भएको छ ।

देशभरबाट ४ लाख २० हजार जनाले ‘कोभसिल्ड’को खोप लगाउँदैछन् । नेपालबाट पहिलो खोप लगाएको टेकु अस्पतालका निर्देशक डा सागर राजभण्डारीले कोरोना खोपले कुनै पनि असर नदेखिएकाले खोप सुरक्षित भएको बताए ।

उनी भन्छन्, ‘खोप लगाउँदैमा भाइसरले आक्रामण नगर्ने भन्ने होइन । खोपले भाइरसलाई मार्ने नभइ भाइरस शरीरभित्र प्रवेश गर्न नदिनु हो । र, खोप लगाएको १४ दिनमा एन्टीबडी बनाउन शुरु गर्छ । यसले शरीरलाई प्रोटेक्सन गर्छ ।’

‘कोभिसिल्ड’ खोप लगाएपछि केही गतिविधि गर्न नहुने डा। भण्डारी बताउँछन् । उनका अनुसार खोप लगाइसकेकाहरुले मध्यपान गर्न हुँदैन र जनस्वास्थ्यको मापदण्ड पालना पर्छ ।

अन्यथा भाइरसको असर देखिन सक्छ । भ्याक्सिन लगाएर समुदायलाई भने सुरक्षित बनाउन मद्दत पुग्छ । पहिलो चरणको खोप लगाएको ४ हप्तापछि दोस्रो खोप लगाउनुपर्ने हुन्छ ।

उनी भन्छन्, ‘१८ वर्ष मुनिका बालबालिका, गर्भवती महिला, दीर्घरोगी, एलर्जी हुने व्यक्तिले खोप लगाउँदा मात्रै यसको असर देखिने हो । त्यस्ता व्यक्तिहरुको हकमा भने खोपले शतप्रतिशत काम गर्दैन । नेपालमा खोपले ७५ प्रतिशत काम गर्छ ।

प्रतिक्रिया

Leave a Reply

Your email address will not be published.