कोरोनाविरुद्धको पहिलो खोप लगाउनेको अनुभव र आग्रह (भिडियो)

काठमाडौं । करिब ११ महिनादेखि शुक्रराज ट्रपिकल तथा सरुवा रोग अस्पताल छिर्न त के वरपरबाट हिँड्न पनि मान्छेहरु डराउँथे । तर बुधबार अस्पतालमा बेग्लै चहलपहल थियो ।

कोरोनाविरुद्धको खोप अभियान सुरु भएकै दिन खोप लगाउँन पाउँदा अस्पतालका निर्देशक सागरराज भण्डारीसँगै अरु स्वास्थ्यकर्मी पनि खुसी देखिन्थे । र, उनीहरुले खुसीसँगै ढुक्कसँग खोप लगाउन सबैलाई आग्रह गरिरहेका थिए ।

हेुर्नुहोस् भिडियो

एक दिनअघिसम्म खोप लगाउन तयार नभएका स्वास्थ्यकर्मी पनि बुधबार खोप लगाउन तयार तम्सिए । अभियान सुरु भएको दिन बुधबार नौ हजार ८४ फ्रन्टलाइनरले खोप लगाएका छन् । खोप लगाउने कसैलाई पनि अहिलेसम्म स्वास्थ्य समस्या नदेखिएको स्वास्थ्य मन्त्रालयले जनाएको छ ।

नेपालमा आजबाट लगाउन सुरु गरिएको खोप बेलायतको अक्सफोर्ड विश्वबिद्यालयका वैज्ञानिकहरुले विकास गरेका हुन् । खोप भारतको सेरम इन्डियाले उत्पादन गरेको हो ।

भारत सरकारले आफ्ना जनताका लागि पनि यही खोप लगाएर खोप अभियान सुरु गरेको थियो । भारतमा खोप अभियान सुरु गरेको ६ दिनपछि अर्थात् माघ ८ गते भारतले नेपाललाई १० लाख डोज खोप उपलब्ध गराएको थियो ।

खोपले भाइरससँग लड्ने एन्टीबडी तयार गर्नेछ र कोरोना संक्रमणबाट हुने जटिल स्वास्थ्य समस्याबाट बचाउँने बताइएको छ । खोप लगाएको २ सातापछि एन्टीबडी बन्न सुरु गर्ने चिकित्सकले बताएका छन् ।