कर्णालीमा कोरोनाविरुद्धको खोप सुरु, पहिलो खोप निर्देशकलाई – Nepal Press

कर्णालीमा कोरोनाविरुद्धको खोप सुरु, पहिलो खोप निर्देशकलाई

सुर्खेत । कोरोना रोग विरुद्धको खोप कर्णालीका नौ जिल्लामा सुरु भएको छ भने डोल्पा जिल्लामा केहि समय पश्चात खोप सुरु हुने भएको छ ।

कर्णाली स्वास्थ्य निर्देशनालयका निर्देशक डा. रविन खड्कालाई पहिलो खोप दिएर खोप कार्यक्रम सुरु भएको प्रदेश अस्पताल कालागाउँ सुर्खेतका कोरोना फोकलपर्सन डा. नवराज केसिले बताए ।

यस्तै, कर्णालीका दश जिल्लामा पहिलो चरणको खोप कार्यक्रम एघार हजार पाँच सय ८० जनामा लगाईने निर्देशक डा. खड्काले बताए । स्वास्थ्यकर्मी, अस्पतालमा कार्यरत सुरक्षाकर्मी, सरसफाईकर्मी, एम्बुलेन्सका चालक, सहचालक र महिला स्वास्थ्यस्वंयसेविकालाई पहिलो चरणमा खोप लगाउन सुरु भएको डा. खड्काले बताए ।

उनका अनुसार डोज खेर जाने सम्भावना भएका कारण प्रतिव्यक्ति दुइ डोजका आधारमा कर्णालीमा २६ हजार डोज आएको हो ।कर्णालीमा पहिलो चरणको खोपका लागि २६ हजार डोज आइपुगेको थियो ।

सुर्खेतमा दुई हजार ७८१, दैलेखमा दुई हजार, जुम्लामा एक हजार ७०२, जाजरकोटमा एक हजार १४५, सल्यानमा एकहजार १२३, कालिकोटमा एक हजार २०, मुगुमा ५४७, डोल्पामा ५११, रुकुमपश्चिम ५०० र हुम्लामा ४५० जनालाई पहिलो चरणमा खोप लगाउन सुरु भएको हो ।

 

प्रतिक्रिया

Leave a Reply

Your email address will not be published.