राष्ट्रिय महिला लिग : वालिङसँग बराबरीमा रोकियो पुलिस – Nepal Press

राष्ट्रिय महिला लिग : वालिङसँग बराबरीमा रोकियो पुलिस

काठमाडौं । उपाधि दाबेदार नेपाल पुलिस क्लब राष्ट्रिय महिला लिगमा मंगलबार वालिङ नगरपालिकासँग १-१ गोलको बराबरीमा रोकिएको छ ।

एन्फा कम्प्लेक्स सातदोबाटोमा भएको खेलको १३औं मिनेटमा वालिङको रक्षापंक्तिले गरेको गल्तीको फाइदा उठाउँदै रेखा पौडेलले पुलिसका लागि गोल गरेकी थिइन् ।

वालिङको रक्षापंक्तिमाथि हाबी बनेको पुलिसले पहिलो हाफमा १-०को अग्रता लिएको थियो ।

निरन्तर प्रयासरत वालिङका लागि ५२औं मिनेटमा अफ्रिकन खेलाडी मेथो ईल्युडी रुथले बराबरी गोल फर्काइन् । बाँकी समयमा दुवै तर्फबाट गोल हुन नसकेपछि खेल बराबरीमा रोकिएको हो ।

पहिलो खेलमा त्रिभुवन आर्मी क्लबसँग बराबरीमा रोकिएको पुलिसले दोस्रो खेलमा चौदण्डिगढी नगरपालिकालाई ६-० ले पराजित गरेको थियो ।

पहिलो खेलमा विराटनगरसँग १-१ गोलको बराबरीमा रोकिएको वालिङ दोस्रो खेलमा आर्मीसँग ७-० ले पराजित भएको थियो ।

प्रतिक्रिया

Leave a Reply

Your email address will not be published.