निर्वाचन आयोगको निर्णयले केपी ओलीको अडानलाई बल पुगेको छ : पोखरेल – Nepal Press

निर्वाचन आयोगको निर्णयले केपी ओलीको अडानलाई बल पुगेको छ : पोखरेल

काठमाडौं । नेपाल कम्युनिष्ट पार्टी (ओली पक्ष) का नेता ईश्वर पोखरेलले निर्वाचन आयोगको निर्णयले प्रधानमन्त्री केपी शर्मा ओलीको अडानलाई बल पुगेको बताएका छन्।

वागमती प्रदेश कमिटीले धुम्वाराहीस्थित पार्टी कार्यालयमा आयोजना गरेको कार्यक्रममा निर्वाचन आयोगको निर्णयलाई सकारात्मक रुपमा लिने पोखरेलले बताए । ‘निर्वाचन आयोगको निर्णयलाई सम्मान गर्छौं, सकारात्मक ढंगले लिन्छौं,’ पोखरेलले भने, ‘शुरुदेखि नै केपी शर्मा ओलीले नेतृत्व गरेको नेकपाको तर्फबाट जे अडान राखिएको थियो, त्यो अडानलाई बल पुग्ने स्थिति हामीले देखेका छौं ।’

निर्वाचन आयोगले प्रचण्ड-माधवपक्षीय नेकपाले गरेको निर्णयलाई भने मान्यता नदिएको उनको जिकिर थियो । उनको भनाइ छ-पुष्पकमल दाहाल ‘प्रचण्ड’ र माधवकुमार नेपालबाट जे कुरा भइरहेको थियो । त्यो कुरालाई ‘रिक्गनाइज’ गरिएको छैन् । उहाँहरुले यसबीचमा जे-जे कुरा गर्न खोज्नुभयो । ती कुनै पनि कुरालाई आयोगले मान्यता दिएको छैन ।’

उनले आफ्नो पक्षीय नेकपाबाट भएका निर्णयलाई भने राजनीतिक भने । ‘केपी शर्मा ओलीले प्रथम अध्यक्षका रुपमा गरेका निर्णयहरू राजनीतिक हुन । कानुनी रुपमा जरुरत पर्दा हामी यथोचित रुपमा प्रस्तुत हुन्छौं,’ पोखरेलको भनाइ छ ।

पोखरेलले प्रचण्ड-माधव पक्षले ओलीमाथि लगाएको अभियोग फिर्ता गरे र तोकिएको निर्वाचनमा जान तयार भए पार्टी एकता कायम रहने बताए । ‘यो एकतालाई कायम राख्ने हो भने दुईटा कुरा गर्नुपर्छ,’ उनको भनाइ छ, ‘कार्तिक २८ गते पार्टी अध्यक्षका रुपमा रहनु भएका पुष्पकमल दाहाल ‘प्रचण्ड’ले अर्को अध्यक्ष सम्माननीय प्रधानमन्त्री ज्यूलाई जुन गम्भीर अभियोग लगाउनु भएको छ, त्यो अभियोग पत्र फिता लिनुपर्छ । घोषित भएको निर्वाचनमा सहभागी हुनका लागि तयार भएर आउनुपर्छ ।

प्रतिक्रिया

Leave a Reply

Your email address will not be published.

सम्बन्धित खवर