भारत र चीनबीच सिक्किम बोर्डरमा झडप, २० भन्दा बढी घाइते

काठमाडौं । चीन र भारत पुनः आमनेसामने भएका छन् । लद्दाखको तनाव नसकिँदै यी दुई मुलुकबीच सिक्किमको उत्तरमा पर्ने नाकुला बोर्डरमा पुनः तनाव भएको छ ।

नाकुला सीमामा तीन दिनअघि दुबै देशका सेनाबीच झडप भएको र दुबै पक्षबीच केही सैनिक घाइते भएको जनाइएको छ । भारतीय संचारमाध्यमले २० भन्दा बढी चिनियाँ सैनिक घाइते भएको जनाएका छन् । तर, भारततर्फको क्षति यकिन छैन ।

परिस्थितीलाई नियन्त्रमा ल्याइएको जनाइएको छ । केही महिनायता लद्दाख तनावपछि यी दुई मुलुकबीच चिसोपन बढेको छ । नाकुला बोर्डर रणनीतिकरुपमा महत्वपूर्ण मानिने चीन र भारतीय सीमाक्षेत्र हो ।

यी दुई देशबीच यसअघि पाङगोङ सो, गलवान, गोग्रा, हट स्प्रिङमा गतवर्षको मे महिनामा तनाव भएको छ । गतवर्षको मे ९ मा पनि नाकुला बोर्डरमा दुबै देशका सैनिकबीच झडप भएको थियो ।

सीमा तनावलाई लिएर भारत र चीनका सैनिक पदाधिकारीबीच नौ पटक निष्कर्षविहिन वार्ता भएको छ । मे ५, २०२० मा पूर्वी लद्दाखमा २५० भन्दा बढी चिनियाँ सैनिक र भारतीय सुरक्षाकर्मीबीच झडप हुँदा केहीले ज्यान गुमाएका थिए ।