विश्व आर्थिक मंचको सम्मेलन सुरु, मोदी र सीले सम्बोधन गर्ने

डाभोस– सन् २०२१ को विश्व आर्थिक मंचको डाभोस सम्मेलन आजदेखि सुरु भएको छ । पाँच दिनसम्म चल्ने सम्मेलन भर्चुअल हुनेछ र विश्व नेताले सम्बोधन गर्दैछन् ।

यसवर्षको डाभोस एजेन्डा ‘विश्वास पुनस्र्थापनाको लागि महत्वपूर्ण वर्ष’ भन्ने रहेको छ । मंचको सत्रमा कोभिड–१९ विरुद्ध खोप अभियान, रोजगारी सिर्जना र जलवायु परिवर्तनका विषयमा छलफल हुनेछ ।

‘केहीवर्षदेखि कोरोना महामारीले विश्वभर संरचनात्मक असमानताको सिर्जना गरेको छ । यो संकटमा सामाजिक र आर्थिक प्रणालीलाई ब्युँझाउनु जरुरी छ’ विश्व आर्थिक मंचले अफिसियल वेबसाइटमा लेखेको छ ।

मंचको भर्चुअल सत्रमा चिनियाँ राष्ट्रपति सी जिङपिङ, भारतीय प्रधानमन्त्री नरेन्द्र मोदी लगायतले सम्बोधन गर्ने कार्यक्रम छ । जिङपिङले सोमबार सम्बोधन गर्नेछन् भने मोदीले आगामी विहिबार ।

जापानी प्रधानमन्त्री योसिहिदे सुगा, फ्रान्सेली राष्ट्रपति इमानुएल मार्कोन, जर्मनी चान्सलर एन्जेला मर्केल, राष्ट्रसंघ महासचिव एन्टोनियो गुर्टेस, युरोपेली केन्द्रिय बैंककी प्रमुख क्रिस्टिन लागार्डसहित विभिन्न देशका सरकार एवं राष्ट्र प्रमुखले सम्बोधन गर्दैछन् ।

मंचको अन्तिम सत्रमा ‘सी मी : अ ग्लोबल कन्सर्ट’ नामक फिल्मको समेत प्रिमियर हुने भएको छ । साथै, विश्वमा योगदान दिने ग्लोबल सेलेव्रिटी र कलाकारलाई क्रिस्टल अवार्डले सम्मान गरिने भएको छ ।