सृष्टि बन्दैछिन् एक दिनको मुख्यमन्त्री, रिलमा होइन रियलमा

काठमाडौं । हिन्दी फिल्म नायक नहेर्ने कमै मान्छे होलान्, जुन फिल्ममा अनिल कपुर एक दिनको लागि मुख्यमन्त्री बन्छन् र त्यो प्रदेशको कायापलट गर्छन् । सन् २००१ मा रिलिज भएको नायक फिल्ममा मात्र देखिएको त्यो दृष्य २० वर्षपछि आज भारतको उत्तराखण्डमा वास्तविकतामा पनि देखिँदैछ ।

हरिद्वार जिल्लाको दौलतपुर गाउँकी १९ वर्षीया सृष्टि गोस्वामी आज एक दिनको लागि उत्तराखण्डको मुख्यमन्त्री बन्दैछिन् । राष्ट्रिय बालिका दिवसको अवसरमा उनलाई एक दिनको मुख्यमन्त्री बनाउन लागिएको बीबीसीले जनाएको छ ।

उनी उत्तराखण्डको पहिलो महिला मुख्यमन्त्री हुनेछिन् । प्रतिकात्मकरूपमा हुने यो कार्यक्रम बाल विधानसभा सत्रमा उनले मुख्यमन्त्रीका रुपमा सरकारको र अन्य विभागहरुको कामको बारेमा जानकारी लिनेछिन् ।

यसक्रममा उनलाई मुख्यमन्त्रीकै रुपमा मानेर सरकारका विभागीय प्रमुखहरुकाले आ-आफ्नो कामको प्रस्तुति दिनेछन् । उत्तराखण्डका मुख्यमन्त्री त्रिवेन्द्र सिंह रावत पनि यस कार्यक्रममा सहभागी हुनेछन् ।

उत्तराखण्ड बाल अधिकार संरक्षण आयोगकी अध्यक्ष उषा नेगीका अनुसाार उत्तराखण्ड सरकारको तर्फबाट सृष्टिलाई एक दिनको मुख्यमन्त्री बनाउने पहल भएको हो र यसको उद्देशइ किशोरीहरुको सशक्तिकरणका लागि जागरुकता फैलाउनु हो ।

सृष्टिले सामाजिक सन्जालमार्फत आफूलाई एक दिनको मुख्यमन्त्री बन्ने अवसर प्राप्त भएकोमा खुसी व्यक्त गर्दै आफूले बालिकाको सुरक्षाका सन्दर्भमा महत्वपूर्ण सुझाव दिने बताएकी छन् ।

कृषि विषयमा स्नातक गरिरहेकी सृष्टीका पिता गाउँमा सामान्य पसल चलाउँछन् ।